बन्दको सदुपयोग गर्दै हेटौंडा-६ का शिक्षक व्यवसायिक कृषिमा व्यस्त

८ भदौ, हेटौंडा । कोरोना महामारीका कारण देशमा लकडाउन र निषेधाज्ञा जारी भएको ५ महिना भएको छ ।
उद्योग, कलकारखाना, ब्यापार व्यवसाय, शैक्षिक संस्था ठप्प छन् । यही बन्दको समय सदुपयोग गर्दै हेटौंडा-६ का एक शिक्षक भने व्यवसायिक कृषिमा समय खर्चिरहेका छन् । हेटौंडा-६ शान्तिट‍ोलमा रहेको मुनलाईट ईन्टरनेशनल स्कूलका संचालक एवं शिक्षक भरत सापकोटा कोरोना महामारीले विद्यालय बन्द भएपछि व्यवसायिक कृषिकर्ममा तल्लिन भएका छन् । व्यवसायिक कृषिको अवधारणाका साथ
उनले ५ जना युवाको समूह नै बनाई रोयल अर्गानिक एग्रो फर्म एण्ड रिसर्च सेन्टर नामक फर्म दर्ता गरि काम गरिरहेका छन् ।
३५ लाख रूपैयाँ भन्दा बढि खर्चेर कृषि व्यवसाय शुरू गरेका सापकोटासहितका युवाहरूको समय १५ कठ्ठा क्षेत्रफलमा फैलिएको कृषि फर्ममा नै वित्ने गरेको छ । लहरे तरकारी वाली, तितेकरेला, लौका, बोडी लगायतका मौसमी र बेमौसमी सिजनका तरकारी बाली, १२ सय लोकल कुखुरा, ३ वटा पोखरीमा विभिन्न प्रजातिका ५ हजार माछा रहेको रिसर्च सेन्टरका अध्यक्ष रहेका सापकोटाले जानकारी दिए ।
विषादी प्रयोग भएका उत्पादन भन्दा विषादीरहित उत्पादन उपभोक्ताले रुचाउने भएकाले मौसमी तथा बेमौसमी तरकारी खेतीसँगै केहि नयाँ प्रजातिका माछा, टर्की, लोकल र बोइलर कुखुरा र बाख्रा पालन गर्न तयारी रहेको बताए ।  आगामी बर्ष देखि वायो फ्लक प्रविधि मार्फत माछा पालन र तालिम सञ्चालन गर्ने  योजनामा रहेको बताए ।
लकडाउन र निषेधाज्ञाले १ करोड रूपैयाँ बढि लगानी रहेको विद्यालय पूर्ण रूपमा बन्द भएपछि स्वरोजगार बन्ने उद्धेश्यले यता लागेको उनको भनाइ छ । युवाहरू कृषि क्षेत्रबाट पलायन भईरहेको अवस्था आफुहरू यो क्षेत्रमा लागेको भन्दै सरकारी एवं गैरसरकारी निकायबाट सहयोगको अपेक्षा गरिएको उनले बताए ।  भिडियो हेर्न लिंकमा क्लिक गर्नुस् ।       https://youtu.be/5zq2K7p4f3c