फेसबुकबाट ठगी गर्ने हेटौंडाका लुइँटेलसहित ३ पक्राउ

१२ भदौ, हेटौंडा । सामाजिक सञ्जाल फेसबुकको प्रयोग गरी ठगी गर्ने हेटौंडाका एकसहित ३ जनालाई प्रहरीले चितवनमा पक्राउ गरेको छ ।
पक्राउ पर्नेमा तनहुँको भिमाद-५ का ४० वर्षीया राजकुमार थापा मगर, चितवनको खैरहनी-१२ सिसाहनीका २८ वर्षीय शिवराज पाठक र हेटौंडा उपमहानगरपालिका–४ बस्ने सत्कार लुँईटेल रहेका छन्  ।
उपहार पठाउने बहानामा उनीहरूले चितवन भरतपुर महानगरपालिका–२० शारदानगर बस्ने आरती रानालाई पटकपटक गरी  २ लाख ५३ हजार २ सय ४० र मोरङको लेटाङ नगरपालिका–९ बस्ने विष्णुकुमारी राईलाई २ लाख ७५ हजार ६ सय ४५ ठगी गरेको गुरुङले जानकारी दिए ।
पक्राउ परेकाहरुबाट प्रेमबहादुर राना, सन्जना पाठकको नामको यातायात व्यवस्था कार्यालय गण्डकीको नक्कली सवारी चालक अनुमति पत्र बरामद गरिएको र सो परिचय पत्रका आधारमा रकम निकाली उक्त रकम सत्कार लुँईटेल, रामकुमार तामाङ, निशाकुसुम भट्टराई, लोकप्रसाद भूर्तेल, मञ्ज केसी र तोजबहादुर केसीको खातामा पठाउने गरेको पाईएको प्रहरीले जनाएको छ।
जिल्ला प्रहरी कार्यालय चितवनका प्रमुख प्रहरी उपरीक्षक नान्तिराज गुरुङकाअनुसार उनीहरुले सामाजिक सञ्जाल फेसबुकमा विदेशीको फोटो राखेर नक्कली अकाउन्ट खोली विभिन्न व्यक्तिसँगबाट ठूलो रकम ठगी गर्ने गरे पाइएको छ ।

लुइँटेललाई केही दिन अघि वडा प्रहरी कार्यालय हेटौँडाबाट खटि गएका प्रहरी निरीक्षक ईश्वरी प्रसाद भण्डारीको टोलीले हेटौँडा-४ बाट  पक्राउ गरी जिल्ला प्रहरी कार्यालय चितवन पठाएको थियो।