कांग्रेस सभापतिमा उठ्ने घोषणपछि निधि चर्चामा

File Photo

१७ भदौ, काठमाडौँ । नेपाली कांग्रेस उपसभापति बिमलेन्द्र निधि यतिबेला पार्टीभित्र चर्चाको केन्द्रमा छन् । सभापति शेरबहादुर देउवाको दाबीका बीच आफूले पनि सभापतिमा प्रतिस्पर्धा गर्ने घोषणा गरेपछि उनी चर्चामा आएका हुन् । उनको उम्मेदवारी घोषणाले पार्टीभित्र संस्थापन र इतरपक्ष दुवैतिरको समूहमा ‘कम्पन’ गराएको छ । यसबाट पार्टीभित्र कायम रहेको परम्परागत समीकरण नै बदलिने अनुमान दुवै पक्षका नेताहरूले गर्न थालेका छन् ।
संस्थापन पक्षमा पार्टी सभापति शेरबहादुर देउवालाई एकल उम्मेदवार ठानिएको थियो । नेतृत्वमा दोहोरिन देउवाले आफ्नो तयारी अघि बढाइरहेकै थिए । निधिले भदौ ४ गते भेटेरै आफ्नो उम्मेदवारीबारे जानकारी गराएपछि भने देउवा ‘सक’ मा परेका छन् । तर उनमा अझै आफू उठेपछि निधि पछि हट्छन् भन्ने बुझाइ रहेको निकट नेताहरू बताउँछन् ।
देउवाले छाडेनन् भने निधि के गर्लान्, निधि साँच्चै पछि हटेनन् भने देउवा के गर्लान् जस्ता सवालहरू अहिले कांग्रेसको अनौपचारिक बैठकका बहस बनेका छन् । निधिले देउवासँग भेटेर उम्मेदवारीको जानकारी मात्रै गराएनन्, ‘तपाईंको उम्मेदवार नै म हुन चाहन्छु’ भनेर सहयोगको आग्रह गरेका थिए । देउवाले १५ औं महाधिवेशनसम्म कुर्न आग्रह गरे तर निधि सहमत भएनन् । असहमतिबीच बूढानीलकण्ठबाट निस्केका निधिले आफ्नो तयारीको ‘गियर’ बढाएका छन् । उनको उम्मेदवारी घोषणा र अहिले गरिरहेको तयारीले पार्टीमा कायम रहेको परम्परागत पोखरीमा छाल आएको छ । ‘अब सबैलाई निधि उम्मेदवार हो भन्ने परिसकेको छ, तर पार्टी सभापतिलाई नै अझै परेको जस्तो लागेको छैन,’ निधिनिकट एक नेताले भने, ‘उहाँले फेरि एकपटक सभापतिलाई भेटेर दिमागमा पर्ने गरी नै उम्मेदवार हो र पछि हट्दिनँ भन्ने गरी प्रभाव पार्न खोज्नुभएको छ, त्यसका लागि केही दिनमै सभापतिसँग भेट्ने तयारीमा हुनुहुन्छ ।’
निधिको स्वभावबारे जानकार नेताहरूले उनको उम्मेदवारी घोषणालाई गम्भीरताका साथ लिएका छन् । आफूलाई लागेको विषयमा अडान राख्ने र कुरा नमिले हस्तक्षेपसमेत गर्न सक्ने स्वभाव उनमा छ । यही स्वभावका कारण कतिपय मुद्दामा सभापति देउवासँग समेत उनको चर्काचर्की पर्ने गर्छ । जस्तो– गत असार तेस्रो साता केन्द्रीय कार्यसमितिकै बैठक लम्बिने भएपछि देउवा सबै निर्णय एकैसाथ गर्ने पक्षमा थिए । तर, निधि नागरिकता विधेयकमा पार्टीको धारणा ल्याइहाल्नुपर्ने पक्षमा उभिए । यो विवादमा दुई नेताबीचको चर्काचर्की भयो ।
(इकान्तिपुरबाट)