म्याद नाघेका र लेबल नभएका सामान भेटियो

८ असार, हेटौँडा । हेटौँडामा आपुर्ति व्यवस्थापन विभाग काठमाडौंले विहिबार गरेको बजार अनुगमनका क्रममा म्याद नाघेका र लेबल नभएका सामान बेचिएको पाइएको छ । हेटौंडा बजारका विभिन्न खाद्यान्न पसल र होटलहरुमा गरिएको अनुगमनका क्रममा यस्तो पाईएको हो । 
अनुगमनका क्रममा हेटौंडाको टिसीएन रोडस्थित बिशाल स्टोर्समा ४७ बोतल किन्ले सोडा ड्रिंक, भुटनदेवी मन्दिररोडस्थित पवित्र मिल्क एण्ड फुड प्रालिमा दुग्ध उत्पादनहरुमा उत्पादन मिति, उपभोग्य मिति लगायतका लेबल नराखी बिक्रि बितरण गरेको पाईएको क्षेत्रीय खाद्य तथा गुण नियन्त्रण कार्यालय हेटौंडाका जगत प्रकाश चौधरीले बताए ।
अनुगमन टोलीले लेबल नलगाइएका उत्पादनहरुलाई संकलन गरी लेबल लगाउन पसल संचालकहरुलाई निर्देशन दिएको र म्याद नाघेका सोडा ड्रिंक, आइसक्रिम बनाउनका लागि प्रयोग गरिने बास्नादार केमिकल नष्ट गरेको छ । 
आपुर्ति व्यवस्थापन विभागका अधिकृत पवन कुमार प्याकुरेलको नेतृत्वमा भएको अनुगमनमा खाद्य प्रविधि तथा गुण नियन्त्रण विभागका अधिकृत शिव प्रसाद भण्डारी, क्षेत्रीय खाद्य तथा गुण नियन्त्रण कार्यालय हेटौंडाका जगत प्रकाश चौधरी सहित, उपभोक्ता हित संरक्षण मञ्चका सचिव मदन प्रसाद रिमाल लगायतको सहभागिता रहेको थियो ।

फाइल तस्विर