वामदेव गौतमविरुद्ध ताराको प्रधानमन्त्रीलाई निवेदन

२१ भदौ, काठमाडौं । राष्ट्रियसभाको रिक्त एक सिटमा आफूलाई नियुक्त गरियोस् भनेर भरतपुर चितवनकी तारा बराल गौतमले प्रधानमन्त्री तथा मन्त्रिपरिषदको कार्यालयमा निवेदन दिएकी छिन् । 
आइतबार दिउँसो सिंहदरबारस्थित प्रधानमन्त्रीको कार्यालयमा पुगेर राष्ट्रियसभा सदस्यका लागि आफू योग्य भएको उल्लेख गर्दै निवेदन दिएको रातोपाटीलाई जानकारी दिइन् । उनले यदि आफूलाई नियुक्त नगरी सरकारले चित्तबुझ्दो जवाफ नदिए अदातलको ढोका ढक्ढकाउने समेत बताएकी छिन् । 
उनले राष्ट्रियसभा जस्तो गरिमायुक्त सदनलाई चुनाव हारेका व्यक्तिहरु थुपार्ने ठाउँ बनाउन लागेको भन्दै त्यसको गरिमालाई कायम राख्न आफू योग्य व्यक्ति भएको उनको जिकिर छ ।  सरकारको सिफारिसमा राष्ट्रपतिबाट नियुक्त गर्ने राष्ट्रियसभा सदस्यको रिक्त एक सिटमा नेकपा सचिवालय सदस्य वामदेव गौतमलाई लैजानेबारे नेकपाले निर्णय गरेको छ । यद्यपि यसबारे सरकारले हालसम्म राष्ट्रपतिलाई सिफारिस भने गरेको छैन । सो स्थानका लागि तारा बराल गौतमले पनि आफ्नो दावी पेश गरेकी हुन् ।  
त्रिभूवन विश्वविद्यालयमा मानवशास्त्र संकाय अन्तर्गत एमफिल दोश्रो सेमेष्टरमा अध्ययन गरिरहेको बताउने गौतमले ३ करोड नेपालीको प्रतिनिधित्व गर्दै आफूले राष्ट्रियसभा सदस्यका लागि निवेदन दिएको उल्लेख गरिन् । उनले आफू राजनीतिक दलसँग आवद्ध नभएको र कुनै दलको साधारण सदस्यता पनि नलिएको दावी गरेकी छिन् । (रातोपाटीबाट)