‘कोरोना विमा रकम व्यक्तिगत खर्चमा भन्दा सामाजिक हितमा लगाएँ’

२४ भदौ, हेटौंडा । नेपाली कांग्रेस हेटौंडा नगरसभापति आनन्दराम पराजुलीले कोरोना विमा रकम व्यक्तिगत खर्चमा भन्दा सामाजिक हितमा लगाएको बताएका छन् । जिल्ला प्रहरी कार्यालयलाई पौष्टिक आहारका लागि ५० हजार रुपैंया हस्तान्तरण गर्दै उनले यस्तो बताएका हुन् ।
उनले आफुले कोरोना संक्रमण पुष्टी भएपछि कोरोना संक्रमितले भोग्ने समस्यालाई नजिकबाट जान्ने अवसर पाएको भन्दै विमाबाट प्राप्त रकम कोरोनाविरुद्धको अभियानका लागि नै खर्चिएको बताए । पौष्टिक आहारको अभावमा कोरोना जित्न नसकिने भन्दै उनले त्यही भएर आफुले कोरोना संक्रमित प्रहरीको पौष्टिक आहारका लागि सहयोग गरेको बताए । उनले प्रहरीसहित कोरोना विरुद्धको अभियानमा अग्रहपंक्तिमा रहेर काम गर्ने सबैप्रति आभारसमेत व्यक्त गरे ।
सहयोग रकम पराजुलीले मकवानपुरका प्रहरी उपरीक्षक सुशिलसिंह राठौरको उपस्थितिमा प्रहरी नायव उपरीक्षक इन्द्रबहादुर रानालाई हस्तान्तरण गरेका थिए ।
पराजुलीले दैनिक ज्याला मजदुरी गरेर खानेहरु पनि आर्थिक अभावका कारण खानेकुराबाट बन्चित भएकाले हेटौंडा–५ मा रहेको फुडबैंकमा पनि सहयोग गरेको बताए । उनले कोरोना संक्रमण पुष्टि भएका ३ पत्रकार र हेटौंडा वडा नम्बर ६ का ५० जनाको कोरोना विमाका लागि समेत रकम सहयोग गरेका छन् ।