सत्तापक्ष नै मान्दैन भिड नगर्ने निर्णय, प्रतिपक्ष पनि उस्तै

२४ भदौ, हेटौंडा । कोरोना संक्रमणको जोखिम बढ्ने भएकाले सरकारले सभा, सम्मेलन, भेला जस्ता गतिविधिलाई पूर्ण रुपमा निषेध गरेको छ । तर सत्तारुद दल नेकपा नै सरकार र स्थानीय प्रशासनको निर्णय उल्लंघन गर्न लागि परेको छ । 
संघीय र प्रदेश सरकारमा नेतृत्व गरेको नेपाल कम्युनिष्ट पार्टी नेकपाले बुधबार प्रशासनको निर्णय नै उल्लंघन गरेर मनहरी गाउँपालिकामा ठूलो भिड जम्मा गरी पार्टी प्रवेश कार्यक्रम गरेको छ । नेकपाका प्रदेश सांसद एवं नेकपा जिल्ला अध्यक्ष मुनु सिग्देल र अर्का सांसद एवं सचिव प्रेमबहादुर पुलामी नै उपस्थित भएर पार्टी प्रवेशको कार्यक्रम गराएका हुन् । कोरोनाको जोखिम रोक्ने गतिविधिमा खटिनुपर्ने सांसदहरु नै भिड जम्मा गर्न खटिंदा यसको विरोध भने चौतर्फी भईरहेको छ । 
मकवानपुरमा राजनैतिक दलहरुबीच भिड जम्मा गर्न प्रतिष्पर्धा नै चलिरहेको छ । दैनिकजसो भिड जम्मा गरेर पार्टी प्रवेश र छोड्ने कार्यक्रम भईरहेको छ । केही दिन अघि बागमती प्रदेश प्रमुख प्रतिपक्ष दल नेपाली कांग्रेसका संसदीय दलका नेता एवं कांग्रेस जिल्ला सभापति इन्द्रबहादुर बानियाँको उपस्थितिमा हेटौंडा–६ मा पनि यस्तै पार्टी प्रवेश कार्यक्रम भएको थियो । त्यो समयमा पनि भिड जम्मा गरेकोमा विरोध भएको थियो ।
तर स्थानीय प्रशासनले यस्ता गतिविधि नियन्त्रण गर्न चासो नदेखाएको सर्वसाधारणको भनाई छ । भिड जम्मा हुन नदिने दायित्व त्यस क्षेत्रका प्रहरीको हुने भएपनि प्रहरीले यसको सूचना नपाएर हो वा वेवास्ता गरेको हो स्थानीयहरुले प्रश्न गरिरहेका छन् ।