आजदेखी हेटौंडा बजार विहान ५ बाट दिउँसो ३ बजेसम्म खुल्ला

२६ भदौ, हेटौंडा । जिल्ला प्रशासन कार्यालय मकवानपुरले भदौ २६ गतेदेखि विभिन्न व्यवसाय र क्षेत्र खुला गर्ने निर्णय गरेसँगै आजबाट हेटौंडा बजार खुला भएको छ ।
हेटौंडा उपमहानगरपालिका र आसपासका क्षेत्रमा कोरोना भाइरसको संक्रमण बढ्न थालेपछि लगाइएको लकडाउन हटाइएपछि हेटौंडा बजारका पसलहरु खुलेका छन् भने सर्वसाधरणको चहलपहल बढेको छ ।
जिल्ला प्रशानस कार्यलय मकवानपुरले मंगलबार गरेको निर्णय अनुसार हेटौंडामा आजबाट विहान ५ बजेदेखि दिउँसो ३ बजेसम्म पसल खुल्ने भएको हो । प्रशासन कार्यालयले विहान र दिउँसो गरी २ समयमा पसल खोल्न निर्णय गरेको छ ।
प्रशासन कार्यलयको निर्णय अनुसार विहान ५ बजेदेखि ९ बजेसम्म खाद्यान्न, तरकारी र दुग्धजन्य पदार्थका पसल व्यवसाय खुल्ने छन भने विहान १० बजेदेखि ३ बजेसम्म अन्य पसल खुल्नेछन् । 
बैंक तथा वित्तीय संस्था विहान १० बजेदेखि ३ बजेसम्म खुल्ला रहनेछन् । यसैगरी नीजि सवारीलाई जोर विजोर प्रणालीमा संचालन हुन दिने निर्णय भएअनुसार आजबाट निजि सवारी साधनहरुपनि जोरविजोर प्रणालीबाट सञ्चालनमा आएका छन् ।
यो निर्णय आजदेखि असोज ५ गतेसम्मका लागि लागु हुने प्रमुख जिल्ला अधिकारी दिपकराज नेपालले जानकारी दिए ।
तर कोरोना संक्रमणको जोखिमलाई मध्यनजर गर्दै केही क्षेत्र भने अर्को सूचना नभएसम्म संचालन नहुने जनाएको छ । 
प्रशासनले शैक्षिक संस्था, धार्मिक एवं सामाजिक स्थल, सैलुन, पार्लर, स्विमङ पुल, सपिङ मल, जिमखाना लगायतका क्षेत्र अर्को सूचना नभएसम्म संचालन नहुने जनाएको हो ।