हेटौंडाका सेवा नदिने एम्बुलेन्स संचालनमा रोक लगाउनुपर्छ : चौलागाई

३१ भदौ, हेटौंडा । हेटौंडाका सेवा नदिने एम्बुलेन्स संचालनमा रोक लगाउनुपर्ने मेडिकल ल्याब्रोटरी एशोसियसन अफ नेपाल (मेलान) का सचिवालय सदस्य उत्सव चौलागाईले प्रतिक्रिया दिएका छन् । 
विरामी भएपछि फोन गर्दा हेटौंडामा एम्बुलेन्स नपाएको गुनासो आईरहँदा उनले एम्बुलेन्सका नाममा भन्सार छुटसहितको सुविधा लिने तर सेवा नदिने एम्बुलेन्स संचालनमा रोक लगाई कारवाही अघि बढाउनुपर्ने प्रष्टखबरलाई प्रतिक्रिया दिएका हुन् । आफुलाई फाइदा हुने र उपयुक्त लाग्ने गन्तव्यमा मात्रै जाने र रातको समयमा सेवा नदिने गुनासो आईरहेको उनको भनाई छ । उनले कोरोनाको जोखिम रोक्न एम्बुलेन्सहरुमा पार्टेसन गरेको र चालकहरुलाई पिपिई सेट समेत उपलव्ध रहेको अवस्थामा विभिन्न बहाना बनाई सेवा नदिने गरेको गुनासो आएको भन्दै उनले यसबारे नियामक निकायले विशेष चासो दिनुपर्ने उनको भनाई छ । 
स्वास्थ्य सेवामा खटिनुपर्ने एम्बुलेन्स चालकले गैरजिम्मेवारी प्रर्दशन गर्न नहुने उनको भनाई छ । यसबारे एम्बुलेन्स चालकहरुको नेतृत्वसंग स्वास्थ्यकर्मीको हिसावले गम्भिर ढंगले छलफल गर्ने उनको भनाई छ । कोरोनाका विरामी र अन्य विरामीलाई उपचारका लागि लैजान हेटौंडामा एम्बुलेन्स खोज्दा नपाएको गुनासो पछिल्लो समय बढिरहेको छ । तर नियामक निकायले बेवास्ता गरेको सर्वसाधारणको भनाई छ ।
एम्बुलेन्सको आचारसंहिता पालना नभए प्रमुख जिल्ला अधिकारीको नेतृत्वमा रहेको जिल्ला एम्बुलेन्स संचालन समितिले दर्ता खारेज र कारवाही गर्न सक्ने कानूनी प्रावधान छ ।