‘महिला हिंसामुक्त हेटौँडा बनाउँछौं’

१२ असार, हेटौँडा । हेटौंडा उपमहानगरपालिकाकी उपप्रमुख मिना लामाले हेटौंडालाई महिला हिंसामुक्त शहर बनाउने प्रतिवद्धता व्यक्त गरेकी छिन् । 
महिला तथा बालबालिका कार्यालय मकवानपुरको आयोजनामा भएको कार्यक्रममा लामाले सरोकारवालाहरुसँगको समन्वयमा महिला हिंसामुक्त शहर निर्माणका लागि कार्ययोजनाका साथ काम गर्ने बताईन् । कार्यक्रममा घरेलु हिंसा पीडित महिलाका लागि अल्पकालीन आश्रय सहितको सेवा केन्द्र सञ्चालक संस्थाहरुले बार्षिक प्रगति विवरण सार्वजनिक गरेका थिए । मकवानपुरमा सञ्चालित ९ सेवा केन्द्रले २०६६ सालयता एक हजार ५ सय २४ वटा हिंसाको घटना दर्ता गरेको महिला तथा बालबालिका कार्यालय मकवानपुरकी प्रमुख शोभा साहले जानकारी दिईन् । 
मकवानपुरको हेटौंडामा जिल्ला सेवा केन्द्रका साथै बसामाडी, मनहरी, सरिखेत, पालुङ, आग्रा, छतिवन, भीमफेदी, फापरबारी र नामटारमा सेवा केन्द्र स्थापना गरिएको छ । महिला तथा बालबालिका कार्यालय प्रमुख शाहको अध्यक्षतामा भएको कार्यक्रममा जिल्ला प्रहरी कार्यालय मकवानपुरका प्रहरी निरिक्षक वेदप्रसाद गौतम, जिल्ला शिक्षा कार्यालय मकवानपुरका शाखा अधिकृत मोतीप्रसाद भट्टराई, पत्रकार सुरेश श्रेष्ठ लगायतले मन्तव्य व्यक्त गरेका थिए । 
कार्यक्रममा जिल्ला समन्वय समिति मकवानपुरका सामाजिक बिकास अधिकृत रामकृष्ण थापा, नेपाल पत्रकार महासंघ मकवानपुरका अध्यक्ष हरि हुमागाई लगायतको उपस्थिति रहेको थियो ।