जनकल्याणद्वारा कोरोना संक्रमित सदस्यलाई निर्ब्याजी ऋण

३ असोज, हेटौंडा । हेटौंडा-६ चौघडामा रहेको जनकल्याण बचत तथा ऋण सहकारी संस्था लिमिटेडले कोरोना संक्रमित शेयर सदस्यलाई निर्ब्याजी ऋण उपलव्ध गराउने भएको छ । संस्थाले कोरोना संक्रमित शेयर सदस्यहरुलाई २५ हजार रुपैंया ऋण निर्ब्याजी प्रदान गर्ने भएको हो । 
कोरोना संक्रमित शेयर सदस्यले प्राप्त गरेको ऋणको ३ महिनासम्म ब्याज नलाग्ने संस्थाका अध्यक्ष हिमाल पौडेलले जानकारी दिए । त्यस्तै महिला शेयर सदस्यहरुमा उद्यम प्रवद्र्धनका लागि संस्थाले नियमित व्याजदरमा ०.५ प्रतिशत ऋण छुटको व्यवस्था गरेको छ । कोरोना संक्रमण रोक्न भएको लकडाउन र निषेधाज्ञाका कारण ऋण भुक्तानीमा असर परेको भन्दै ऋणी शेयर सदस्यहरुको भुक्तानीको समयलाई पुर्नतालिकिकरण गरेको पौडेलले जानकारी दिए । संस्थाले अहिलेको प्रतिकुल परिस्थितिको मूल्यांकन गर्दै शेयर सदस्यहरुको हितमा कदम चालेको उनको भनाई छ ।
संस्थाले शेयर सदस्य महिलाको सुरक्षित मातृत्वको लागि प्रोत्साहन स्वरुप स्वास्थ्य संस्थामा सुत्केरी हुँदा १२ सय रुपैंया र घरमै भएमा एक हजार रुपैंया उपलव्ध गराउने गरेको छ । त्यस्तै बच्चालाई खुत्रुके उपहार दिने गरेको छ । यस्तो प्रोत्साहन रकम २ वटा सन्तान हुँदासम्म उपलव्ध गराउने संस्थाले जनाएको छ ।