मकवानपुर प्रहरीद्वारा २ विप्लव कार्यकर्ता पक्राउ, रिहा गर्न ‘विप्लव’को माग

सांकेतिक तस्विर

५ असोज, हेटौंडा । मकवानपुर प्रहरीले नेत्र विक्रम चन्द ‘विप्लव’ नेतृत्वको नेपाल कम्युनिष्ट पार्टी मकवानपुरका एक नेतासहित २ जनालाई पक्राउ गरेको छ । प्रहरीले जिल्ला सदस्य गुणसिं रुम्बा र कार्यकर्ता दिनेश लामालाई पक्राउ गरेको हो । 
मकवानपुरका प्रहरी नायव उपरीक्षक इन्द्रबहादुर रानाले उनीहरुलाई पक्राउ गरेको पुष्टी गरेका छन् । पक्राउ परेका दुबैलाई जिल्ला प्रशासन कार्यालय मकवानपुरबाट ‘सार्वजनिक हित, स्वास्थ्य, सुरक्षा, सुविधा र नैतिकता बिरुद्धका कसूर’ मा म्याद थप गरी अनुसन्धान भईरहेको उनले बताए ।
यता, नेत्र विक्रम चन्द ‘विप्लव’ नेतृत्वको नेपाल कम्युनिष्ट पार्टी मकवानपुरले पक्राउ परेका आफ्ना एक नेतासहित २ जनालाई रिहा गर्न माग गरेको छ । सोमबार पार्टीका जिल्ला इन्चार्ज जमिनद्वारा जारी विज्ञप्तिमा आफ्ना जिल्ला सदस्य गुणसिं रुम्बा र ‘साधारण जनता’ दिनेश लामालाई रिहा गर्न माग गरिएको हो । 
विज्ञप्तिमा उनीहरुलाई असोज २ गते राति मनहरी गाउँपालिका वडा नम्बर २ स्थित घरमा सुतिरहेको अवस्थामा गिरफ्तार गरिएको जनाईएको छ । आफ्ना कार्यकर्ता गिरफ्तारको काम छोडी जनताको काममा लाग्न चेतावनी दिंदै विना सर्त रिहा गर्न माग गरिएको छ ।