विपदको असर र न्यूनिकरणबारे प्रदेशसभा सचिवालयद्वारा अन्तरक्रिया

५ असोज, हेटौंडा । बागमती प्रदेशको प्रदेश सभा सचिवालयले सोमबार बागमती प्रदेशमा कोभिड १९ र बाढीपहिरो लगायत प्राकृतिक विपत्तिले पारेको असर र न्यूनिकरणका लागि भएका प्रयासबारे अन्तरक्रिया गरेको छ । 

भिडियो कन्फ्रेन्स मार्फत अन्तरक्रिया भएको हो । कोरोनाका कारण संसद बैठक बस्न नसकेको अवस्थामा भिडियो कन्फ्रेन्समार्फत अन्तरक्रिया गरिएको जनाईएको छ ।  अन्तरक्रियामा मूख्यमन्त्री डोरमणी पौडेलले प्रदेश सरकारले प्रदेशका विभिन्न ८ वटा जिल्लाहरुका अस्पताललाई  प्रदेश अस्पतालमा स्तरोन्नति गरी कोरोना नियन्त्रणका कामलाई अघि बढाएको बताए । उनले स्थानीय तह र संघीय सरकारसँगको समन्वयमा आईसोलेसन तथा क्वारेन्टाईन ब्यवस्थापन गरिरहेको र पिसिआर परिक्षणको दायरा बढाइएको दाबी गरे । 

कार्यक्रममा प्रतिपक्षी दल नेपाली कांग्रेसका नेता ईन्द्रबहादुर बाँनियाँले सरकारले कोरोनाको महामारीले प्रभावित विभिन्न क्षेत्रमा दैनिक ज्यालादरी गर्ने मजदुरहरुलाई यो चाडपर्वको समयमा स्थानीय तहसँगको समन्वयमा आर्थिक रुपमै सहयोग गर्नुपर्नेमा जोड दिए । अन्तरक्रियामा प्रदेशसभा सदस्यहरुले सरकारले थप जिम्मेवार भएर महामारी नियन्त्रणमा लाग्नुपर्नेमा जोड दिएका थिए । कार्यक्रममा सामाजिक विकास मन्त्रालयको तर्फबाट डा. पुरुषोत्तमराज सेढाईले सामाजिक विकास मन्त्रालयबाट कोभिड १९ को सम्बन्धमा भएका कामको विषयमा कार्यपत्र प्रस्तुत गरेका थिए । बागमती प्रदेशका माननीय सभामुख सानुकुमार श्रेष्ठको अध्यक्षतामा भएको कार्यक्रममा प्रदेश सभा सचिव कृष्णहरी खड्काले सहजिकरण गरेका थिए ।

कार्यक्रममा बागमती प्रदेश सरकारका मन्त्रीहरु, प्रदेश सभाका माननीय उपसभामुख राधिका तामाङ, संसदको विषयगत समितिका सभापतिहरु ,प्रदेश सभाका सदस्यहरु, प्रमुख सचिव डा. मानबहादुर बिक, प्रदेश सरकारका मन्त्रालयका सचिव लगायतको सहभागिता रहेको थियो ।