आइपिएलः चेन्नईलाई हराउँदै राजस्थानको विजयी सुरुवात

७ असोज, हेटौंडा । चेन्नई सुपर किंग्सलार्य हराउँदै राजस्थान रोयल्सले इन्डियन प्रिमियर लिग (आइपिएल) २०२० मा विजयी सुरुवात गरेको छ । 
मंगलबार राति भएको खेलमा राजस्थानले चेन्नई सुपर किंग्सलाई १६ रनले पराजित गर्दै पहिलो खेलमा जित हात पारेको हो । 
जितका लागि २ सय १७ रनको लक्ष्य पछ्याउने क्रममा चेन्नई २० ओभरमा ६ विकेट गुमाउँदै २ सय रनमात्र समेटिएपछि राजस्थान विजयी भयोे ।
चेन्नईका लागि फाफ डू प्लेसिसले अर्धशतकीय पारी खेले । ३६ बल खेलेका उनले १ चौका र ७ छक्काको सहयोगमा ७२ रन बनाए । त्यस्तै शेन वाटसनले ३३ रन बनाउँदा केदार जादबले २२ तथा महेन्द्र सिंह धोनीले २९ रनको योगदान गरे ।
बलिङतर्फ राजस्थानका लागि राहुल तेवातियाले सर्वाधिक तीन विकेट लिए । तयस्तै टोन करन, जोफ्रा आर्चर र स्रेयस गोपालले एक–एक विकेट लिए ।
यसअघि टस हारेर पहिले ब्याटिङ गरेको राजस्थानले निर्धारित २० ओभरमा ७ विकेट गुमाउँदै २१६ रन बनाएको थियो । राजस्थानका लागि सञ्जु श्यामसन ७६ र स्टिभ स्मिथले ६९ रन बनाए । 
यस्तै राजस्थानका लागि जोर्फा आर्चरले २७ रन बनाउँदा राहुल तेवतियाले १० रन बनाए । बलिङतर्फ चेन्नईका लागि श्याम करनले तीन विकेट लिए । 
त्यस्तै दीपक चहाल, लुङ्गी एन्गिडी र पिउस चाहोलाले एक–एक विकेट लिए । प्रतियोगिता अन्तर्गत बुधबार कोलकाता नाइट राइडर्स र मुम्बई इन्डियन्स खेल्नेछन् ।