डा. केसीका माग पुरा गर्न पूर्वराष्ट्रपति यादवको आग्रह

१६ असोज, हेटौंडा । पूर्वराष्ट्रपति डा. रामवरण यादवले त्रि.वि. शिक्षण अस्पतालमा अनशनरत डा. गोविन्द केसीलाई भेटेका छन् ।
चिकित्सा शिक्षा सुधारको माग राख्दै अनशनरत डा. केसीको स्वास्थ्य अवस्था बुझ्न पूर्वराष्ट्रपति यादव शुक्रबार त्रि.वि. शिक्षण अस्पतालमा पुगेका हुन् । 
डा. केसीलाई भेटेपछि पत्रकारहरुसँग कुरा गर्दै पूर्वराष्ट्रपति यादवले चिकित्सा शिक्षा सुधारको लागि जायज माग राखी सत्याग्रहमा बसेका डा. केसीसँग सरकारले तत्काल वार्ता गर्नुपर्ने प्रतिकृया दिए ।
उनले आफ्नो ज्यानको प्रवाह नगरी सत्याग्रह मार्फत जनताको मागलाई उठाउँदै आएकाले डा. केसी राष्ट्रको सम्पत्तिको रुपमा रहेको बताउँदै उनले डा. केसीको ज्यान बचउन पनि सरकारले छिटो भन्दा छिटो वार्तामार्फत समस्या समाधान गर्नुपर्ने बताए ।
डा. केसीको यो १९ औं सत्याग्रह हो । विभिन्न माग राखि १९ दिन अघिदेखि जुम्लाबाट सत्याग्रह सुरु गरेका डा. केसी अहिले त्रि.वि. शिक्षण अस्पतालमा रहेका छन् ।
चिकित्सा शिक्षा सुधार, कोभिड १९ रोकथाम तथा नियन्त्रण सम्बन्धमा विभिन्न माग राखी डा. केसी अनशनमा बसेका छन । तर सरकारले १९ दिन वित्दा समेत समस्या समाधानका लागि अहिले सम्म कुनै पहल गरेको छैन् ।