महिला उद्यमीको राष्ट्रिय भेला हेटौंडामा

१८ असार, हेटौंडा । नेपाल उद्योग वाणिज्य महासंघले देशभरी रहेका महिला उद्यमीहरुको राष्ट्रिय भेला आउँदो असार २३ र २४ गते मकवानपुरको हेटौंडामा गर्ने भएको छ ।

राष्ट्रिय भेलामा अर्थतन्त्रमा महिला उद्यमीहरुको भूमिका तथा महिला उद्यमीहरुको प्रवर्दनको विषयमा छलफल गरिने अाइतबार हेटौंडामा भएको पत्रकार सम्मेलनमा जनाईएको छ । स्थानीय कार्यक्रमको संयोजक मकवानपुर उद्योग वाणिज्य संघका अध्यक्ष तथा महासंघका केन्द्रीय सदस्य राजकुमार न्यौपानेले हेटौडामा कार्यक्रमको बारेमा सञ्चारकर्मींहरुलाई जानकारी दिएका थिए ।

देशभरीका  नगर उद्योग वाणिज्य संघमा आबद्ध तथा व्यवसायमा क्रियाशील करीब १ सय ५० जना महिला उद्यमीहरुको सहभागिता रहने कार्यक्रममा आ–आफ्नो क्षेत्रका समस्या, कानूनी रुपमा आएका व्यवधानहरुको बारेमा छलफल गरिने र छलफलको 
निष्कर्षलाई महिला उद्यमी घोषणा पत्रको रुपमा कार्यान्वयनका लागि नेपाल सरकार समक्ष पेश गरिने आयोजकले जनाएको छ । 

महासंघकी अध्यक्ष भवानी राणाको प्रमुख आतिथ्यता रहने कार्यक्रममा महिला उद्यमीहरुको उत्पादनको समेत प्रदर्शनी गरिने जनाईएको छ ।

नेपालको कूल ग्राहस्थ उत्पादनको ५० प्रतिशत योगदान महिलाहरुको रहेको र हाल सञ्चालनमा रहेका सानातिना समेत गरी करीब २ लाख उद्योगहरु महिलाहरुकै नामबाट सञ्चालनमा रहेको पत्रकार सम्मेलन मार्फत जानकारी दिईएको थियो ।