विप्लवका कम्पनी कमिश्नर विष्फोटक पदार्थसहित पक्राउ

१३ कार्तिक, विराटनगर । जिल्ला प्रहरी कार्यालय मोरङले नेत्र विक्रम चन्द विप्लव नेतृत्वको नेकपाका कम्पनी कमिश्नरलाई पक्राउ गरेको छ।
पक्राउ पर्नेमा चन्द समूहका पूर्वी कमाण्डका कम्पनी कमिश्नर इलामको चुलाचुली गाउँपालिका-६ का विज्ञान राई 'समन' र सप्तरीको सुरूंगा नगरपालिका-२ का काशीनाथ घिमिरे 'प्रतिक' लाई बुधबार पक्राउ गरेको हो ।
उनीहरुको साथबाट १ थान भरुवा बन्दुक, त्यसमा प्रयोग हुने १ बट्टा फलामको टुक्रा, जिलेटिन ३ किलो, सुतली बम २ थान, सकेट बम १ थान, टुकी बम १ थान, इलेक्ट्रिक डेटोनेटर ३५ थान, नन इलेक्ट्रिक डेटोनेटर १८ थान, लाईटर ६ थान, १२ भोल्टको ब्याट्री १ थान र गन पाउडर र बारुद ४ बट्टा बरामद गरेको जनाइएको छ ।
त्यस्तै सेफ्टी फ्युज तार ३८ मिटर, बिजुलीको तार ९० मिटर, १० थान मोबाइल, खुकुरी ४ थान, दाउ १ थान, नेपाल टेलिकमको ७ वटा र एनसेलको २ वटा सिमकार्ड र १५ हजार रूपैयाँ बरामद गरेको प्रहरीले जनाएको छ ।
मोरङको मिक्लाजुंग गाँउपालिकामा स्थानीयसंग चन्दा रकम असुल गर्दै गर्दा मिक्लाजुंग-१ घुर्मिसेस्थित विजुलीप्रसाद तिम्सिनाको घरबाट पक्राउ गरिएका उनीहरूको  साथबाट हतियार, विष्फोटक पदार्थ, चन्द समूहको दस्तावेजका सामग्री फेला परेको मोरङका प्रहरी प्रमुख प्रहरी उपरीक्षक सन्तोष खड्काले जानकारी दिए ।