महासंघको प्रदेश संरचना व्यवस्थित गर्नु मेरो मूख्य एजेण्डाः न्यौपाने

७ मंसिर, हेटौंडा । नेपाल उद्योग बाणिज्य महासंघका केन्द्रीय सदस्यका उम्मेदवार राजकुमार न्यौपानेले महासंघको प्रदेश संरचनालाई स्थापित र व्यवस्थित गर्नु आफ्नो मूख्य एजेण्डा भएको बताएका छन् ।
आफ्नो उम्मेदवारीबारे हेटौंडामा भएको पत्रकार भेटघाट कार्यक्रममा उनले प्रदेश संरचनालाई व्यवस्थित गर्ने आफ्नो मुख्य एजेन्डा भएको बताएका हुन् । उनले प्रदेशको जिल्ला नगर उद्योग वाणिज्य संघलाई बलियो र व्यवस्थित बनाउन सचिवालय र कार्यालयहरु स्थापना गर्न आफुले कार्यकाल खर्चिने बताए । प्रदेश उद्योग वाणिज्य संघको भवन निर्माण गर्दै प्रदेशको राजधानी हेटौंडामा नै सचिवालय स्थापना गर्नलाई समन्वयकारी भूमिका निर्वाह गर्ने उनको भनाई छ ।
उद्योग व्यवसायमा पछिल्लो समय देखिएको विषम परिस्थितिको अन्त्य गर्दै औद्योगिक वातावरण सहज बनाउन आफुले समन्वयकारी खेल्ने उनको दावि छ । आफुले विजय हासिल गरे बागमती प्रदेशमा लगानी भित्र्याउन पहल गर्ने बताउँदै उनले  हेटौंडा र सिन्धुलीमा सरकारले बनाउन लागेको औद्योगिक क्षेत्रमा विदेशी लगानी ल्याउन समन्वय गर्ने बताए । उद्योगी र श्रमिकबीच देखिएका समस्या नीतिगत रुपमै समाधान गर्न पनि आफुले काम गर्ने उनको दावि थियो ।