‘मकवानपुरका अन्तरघातीलाई कारवाही खोई?’

२९ असार, हेटौँडा । स्थानीय तह निर्वाचनमा आप्mनै पार्टीका उम्मेदवारलाई हराउन भूमिका खेल्ने ‘अन्तरघाती’ लाई कारवाही गर्ने विषय सेलाउँदै गएको छ । 
बैशाख ३१ गते भएको निर्वाचन सकिए लगतै मकवानपुरका राजनैतिक दलका नेता कार्यकर्ताले अन्तरघातिलाई कारवाही गर्नुपर्ने आवाज चर्को रुपमा उठाएपनि अहिले भने यो विषय सेलाउँदै गएको हो । कार्यकर्ताले भने अन्तरघातिलाई कारवाही नगरेको भन्दै नेतृत्वसंग असन्तुष्टि व्यक्त गरिरहेका छन् । निर्वाचन सम्पन्न भएको २ महिना हुन लाग्दा अहिलेसम्म कुनै पार्टीले पनि कारवाही गरेको खबर छैन । 
विशेष गरी, नेपाली कांग्रेस, नेकपा एमाले, नेकपा माओवादी केन्द्र, राप्रपामा अन्तरघातको मुद्धा चर्को रुपमा उठेको थियो । नेपाली कांग्रेसले निर्वाचनमा भएको अन्तरघातबारे एक साताभित्र प्रतिवेदन बुझाउन सम्बन्धित तहलाई निर्देशन दिए पनि अहिलेसम्म यसको निक्र्यौल भएको छैन । साउन २ गते हुने जिल्ला बैठकमा यसबारे चर्चा हुन सक्ने कांग्रेसका एक नेताले बताए ।
नेकपा एमालेका तल्लो तहबाट अन्तरघात गर्नेको नाम किटान गरी कारवाहीका लागि जिल्लामा आग्रह भएपनि यसबारे कुनै टुंगो नलागेको एक कार्यकर्ताले बताए । नेकपा माओवादी केन्द्रले चुनावी समिक्षा गर्दै अन्तरघात पहिचानका लागि समिति बनाएपनि कहिले कारवाही अघि बढ्ने हो अहिलेसम्म यसको निक्र्यौल भएको छैन । 
त्यस्तै केही दिन अघि भएको जिल्ला भेलामा राप्रपाका उम्मेदवार, नेता र कार्यकर्ताले पार्टीका उम्मेदवार हराउन अन्तरघात भएकाले कारवाहीका लागि जिल्ला नेतृत्वलाई आग्रह गरेका थिए । तर राप्रपामा पनि यसबारे ठोस कदम अघि नबढेको एक जिल्ला नेताले बताए ।
स्थानीय तहमा भएको अन्तरघातमा संलग्नलाई कारवाही नगरे आगामी दुई चुनावमा यसले नकारात्मक असर गर्ने कार्यकर्ताहरुको भनाई छ ।