भौतिक दुरी र स्वास्थ्य मापदण्ड पालन गरी संसद चलाउन सुझाव

२४ मंसिर, हेटौंडा । विज्ञहरुले भौतिक दुरी र स्वास्थ्य मापदण्ड इमान्दारीकासाथ पालना गरी संसद चलाउँन सकिने सुझाव दिएका छन् । बुधबार संघीय संसदले कोभिड–१९ संक्रमणकाबीच संसद चलाउने बारेमा गरेको छलफलका क्रममा विज्ञहरुले यस्तो सुझाव दिएका हुन् ।
बुधबार संसद सचिवालयले काठमाडौंमा विज्ञहरुसँग छलफल गरेर संसद चलाउने उपायको खोजी गरेको हो । सचिवालयले सरुवारोग विशेषज्ञ डा. शेरबहादुर पुन र जनप्रशासन विज्ञ एवं पूर्व सांसद जनकराज जोशीसँग छलफल गरेको हो । 
छलफलमा सरुवा रोग विशेषज्ञ डा. पुनले सतर्क भएर स्वास्थ्य मापदण्ड पुरा गरेर संसदको बैठक चलाउन सकिने सुझाव दिएका छन् । यस्तै भौतिक दुरी र स्वास्थ्य मापदण्ड इमान्दारीसाथ पालना गर्न पनि डा. पन्तले आग्रह गरे ।
छलफलमा जनप्रशासन विज्ञ एवं पूर्व सांसद जोशीले सदनको बैठक थोरै सांसदको उपस्थितिमा चलाउन सक्ने गरी व्यवस्था गर्न आवश्यक रहेको बताए । उनले सदनको बैठकमा भौतिक दुरी कायम गर्ने, मास्क लगाउने, हात धुने व्यवस्थालाई कडाईका साथ पालना गर्न सके बैठक चलाउँदा कुनै समस्या नहुने सुझाव दिए । 
छलफलमा विज्ञहरुले संसद चलाउने विषयमा राजनैनिक दलहरुबीच मतैक्यता हुन आवश्यक रहेको पनि बताएकाछन् ।