व्यवस्थाप्रति नै जनतामा वितृष्णा पैदा भएको छः कमल थापा

२५ मंसिर, हेटौंडा । राष्ट्रिय प्रजातन्त्र पार्टीका अध्यक्ष कमल थापाले अहिलेको व्यवस्थाप्रति नै जनतामा वितृष्णा पैदा भएको दावी गरेका छन् ।
हेटौंडामा विहिबार आयोजित ‘झण्डा तथा चुनाव चिन्ह अनावरण’ कार्यक्रममा बोल्दै राप्रपा अध्यक्ष थापाले संघीयता, गणतन्त्र र धर्म निरपेक्षताप्रति नै जनतामा वितृष्णा पैदा भएको दावि गरेका हुन् ।
उनले पछिल्लो समय देशभर राजतन्त्रको पक्षमा भएको गतिविधि व्यक्तिप्रतिको भन्दा पनि व्यवस्थाप्रतिको वितृष्णाका कारण भईरहेको बताए । उनले वर्तमान सरकारले भ्रष्टाचारलाई थप मलजल गरेको भन्दै अहिले बार्षिक झण्डै एक खर्ब भ्रष्टाचार हुने गरेको जिकिर गरे । देशमा जनप्रतिनिधिले नै शासन गर्ने बताउँदै उनले अभिभावकको रुपमा राजालाई राख्नुपर्ने आफुहरुको एजेण्डा रहेको स्पष्ट पारे ।
राप्रपाको विगतदेखिको एजेण्डालाई लिएर अहिले देशभर स्वस्फुर्त रुपमा भईरहेको प्रर्दशनमा पार्टीको समर्थन रहेको उनको भनाई थियो । उनले आफ्नो चाहना नहुँदा नहुँदै पनि पार्टी एकिकरणका लागि वातावरण बनाउन चुनाव चिन्ह हलो स्विकारेको बताए । आफु पार्टीलाई एक ढिक्का बनाएर अघि बढाउन तयार रहेको समेत बताए ।
राप्रपा मकवानपुरका अध्यक्ष रामहरी न्यौपानेको अध्यक्षतामा भएको कार्यक्रममा केन्द्रीय सदस्यहरु मधु अधिकारी, राजाराम वर्तौला, विजय खड्का, बालकृष्ण कार्की लगायतले मन्तव्य व्यक्त गरेका थिए ।