पन्ध्रविगाह टोलविकासको साधारणसभा सम्पन्न

२५ मंसिर, हेटौंडा । हेटौंडा उपमहानगरपालिका वडा नम्बर ६ रामनगरमा रहेको पन्ध्रविगाह टोल विकास संस्थाको चौथो वार्षिक साधारणसभा बुधबार सम्पन्न भएको छ । संस्थाका अध्यक्ष कृष्णप्रसाद पौडेलको अध्यक्षता एवम् हेटौंडा ६ का वडा अध्यक्ष अर्जुनप्रसाद चौलागाईको प्रमुख आतिथ्यतामा कार्यक्रम भएको हो ।
कार्यक्रममा वडा अध्यक्ष चौलागाईले वडाका विकास निर्माणको काममा टोल विकास संस्थाहरुलाई साथै लिएर काम गर्ने प्रतिवद्धता व्यक्त गरे । टोल सुधारका लागि टोल विकास संस्थाहरुले चालेको कदमको प्रसंशा गर्दै थप प्रभावकारी ढंगबाट काम गर्न उनले आग्रह समेत गरे । टोल विकास संस्थाले गर्ने काममा वडा कार्यालयबाट आवश्यक पर्ने सहयोगको लागि सदैव तत्पर रहेको उनले बताए । 
कार्यक्रममा टोल विकास संस्थाका सचिव यमलाल अधिकारीले संस्थाको प्रगति प्रतिवेदन प्रस्तुत गरेका थिए । २९ घरधुरी रहेको टोल विकास संस्थामा संस्थाको अगुवाईमा सिंचाई आयोजनाको निर्माण समेत भएको अध्यक्ष पौडेलले जानकारी दिए । 
संस्थाको पहलमा वडा कार्यालयको सहयोगमा निर्माण भएको सिंचाई आयोजनाबाट १५ घरधुरीले सुविधा पाईरहेको पौडेलको भनाई छ । कार्यक्रममा टोल विकास संस्था ६ नम्बर वडा समन्वय समितिका अध्यक्ष केशव धिताल, सञ्चारकर्मी रुपेश दुलाललगायतको आतिथ्यता रहेको थियो ।