संवैधानिक परिषदको बैठक विना निर्णय सकियो

१ पुष, हेटौंडा । प्रधानमन्त्री निवास बालुवाटारमा बुधबार साँझ बसेको संवैधानिक परिषदको बैठक विना कुनै निर्णय सकिएको छ ।
प्रमुख प्रतिपक्षी दलको नेता र सभामुखको उपस्थति बिनै प्रधानमन्त्री केपी ओलीले बोलाएको संवैधानिक परिषदको बैठक कुनै निर्णय नै नगरी सकिएको बालुवटार स्रोतले जानकारी दिएको छ ।
पार्टी र प्रतिपक्षसमेतलाई बेवास्ता गर्दै एकाएक राष्ट्रपतिबाट संवैधानिक परिषदको बैठक बस्ने र निर्णय लिने प्रावधान संशोधन गरेर अध्यादेश जारी गरेपछि हिजो साँझ पहिलो बैठक बसेको थियो ।
बैठकमा परिषद अध्यक्षसमेत रहेका प्रधानमन्त्री केपी शर्मा ओलीका अतिरिक्त अर्का दुई सदस्य राष्ट्रियसभा अध्यक्ष गणेश तिमिल्सिना र प्रधानन्यायाधीश चोलेन्द्रशम्शेर जबरा उपस्थित भएका थिए ।
बैठकपछि राष्ट्रिय सभाका अध्यक्ष गणेश तिमिल्सिनाले बैठकले कुनै नियुक्ति नगरेको जानकारी दिँदै विभिन्न संवैधानिक निकायमा रिक्त रहेको पदमा नियुक्तिबारे छलफल मात्रै भएको बताए ।
यसअघि हिजै मंगलबार सरकारले प्रधानमन्त्रीसहित ३ जना सदस्य उपस्थित भएमा परिषदको बैठकका लागि गणपूरक संख्या पुगेको मानिने गरी संवैधानिक परिषदसम्बन्धी अध्यादेश ल्याएको छ । जसमा ३ जना सहमत भएमा निर्णय गर्न सकिने व्यवस्था गरिएको छ ।
तर सरकारले ल्याएको यस विधेयकको प्रधानमन्त्रीको आफ्नै पार्टी नेकपाका नेताहरुका साथै विपक्षीसहित सर्वत्र विरोध भएको छ ।