संसद विघटन संविधानमाथिको आक्रमणः नेपाली कांग्रेस–सर्वदलीय बैठक

६ पुस, हेटौंडा । नेपाली कांग्रेसको आह्वानमा बसेको सर्वदलीय बैठकले संसद विघटन संविधानमाथिको आक्रमण भएको निष्कर्ष निकालेको छ । 
कांग्रेसको पार्टी कार्यालय सानेपामा बसेको बैठकले संसद विघटन संविधान विपरित भएको भन्दै संविधान माथिको आक्रमण भएको निष्कर्ष निकलेको हो । 
बैठकपछि नेपाल कम्युनिष्ट पार्टी (नेकपा) प्रवक्ता नारायणकाजी श्रेष्ठले आइतबार प्रतिनिधिसभा विघटनको घोषणालाई संविधान विरोधी र अलोकतान्त्रिक कदम भएको निष्कर्ष बैठकले निकालेको जानकारी दिए । 
संसद विघटनको निर्णय विरुद्ध तीन वटै पार्टीले एकतावद्ध भएर अगाडी बढ्ने समझदारी भएको पनि उनले बताए । मंगलबार तीनवटै दलले केन्द्रीय कमिटी बैठक बोलाएको उल्लेख गर्दै प्रवक्ता श्रेष्ठले बैठकपछि पुनः बैठक बसी आगामी कार्यक्रम घोषणा गरिने जानकारी दिए ।
यस्तै कांग्रेस नेता रमेश लेखकले प्रधानमन्त्रीको असंवैधानिक कदम विरुद्ध तीनवटै पार्टी एकमत भएको निष्कर्ष बैठकले निकालेको जानकारी दिए ।
केन्द्रीय कार्यसमिति बैठकपछि आगामी दिनमा सरकारको यो कदम विरुद्ध कसरी अगाडी बढ्ने भन्ने कुरामा सहमति हुने पनि उनले बताए ।
राष्ट्रपति विद्यादेवी भण्डारीले आइतबार संसद विघटनको घोषणा गरेपछि त्यसको चर्को आलोचना भइरहेको छ ।