नारायणी बहुद्देश्यीय सहकारीले रजत महोत्सव विभिन्न कार्यक्रम गरी मनाउँने

९ पुस, हेटौंडा । आफ्नो २४ औं वार्षिक साधारणसभा एवम् रजत महोत्सवको अवसरमा हेटौंडा उपमहानगरपालिका वडा नम्बर ९ मा रहेको नारायणी बहुद्देश्यीय सहकारी संस्थाले विविध कार्यक्रमको आयोजना गर्ने भएको छ । 
बुधबार पत्रकार सम्मेलनको आयोजना गर्दै सहकारीले पुस ९ गतेदेखि पुस १५ गतेसम्म सप्ताहव्यापी कार्यक्रम गरी रजत महोत्सव मनाउन लागिएको जानकारी दिएको हो ।
पत्रकार सम्मेलनमा संस्थाका अध्यक्ष रामहरि न्यौपानेले कोरोना महामारीका कारण सहकारीको कार्यक्रम फरक ढंगबाट गर्न लागिएको जानकारी दिए । अध्यक्ष न्यौपानेका अनुसार पुस ९ गते विहीबार संस्थाको परिस र मेनरोडको सरसफाई कार्यक्रम र साधारणसभाको शुभारम्भ गरिनेछ । 
त्यस्तै १० गते संस्थाको प्राङ्गणमा नगरस्तरीय वक्तृत्वकला प्रतियोगिताको आयोजना गरिनेछ भने ११ गते रक्तदान तथा वृद्धवृद्धा सम्मानको कार्यक्रम राखिएको छ । १२ गते औद्योगिक क्षेत्रको नवनिर्मित भवन अगाडि धुपीको बिरुवा रोप्ने कार्यक्रम तय गरिएको छ । १३ गते सदस्यहरु र संस्थाका सञ्चालक तथा कर्मचारीहरुबीच मैत्रीपूर्ण फुटबल प्रतियोगिता राखिएको छ ।
यस्तै १४ गते मान सेवा आश्रममा आश्रितलाई खाद्यान्न बितरणको कार्यक्रम गरिने र १५ गते २४ औं वार्षिक साधारणसभा तथा रजत महोत्सव समापन कार्यक्रम राखिएको संस्थाका अध्यक्ष न्यौपानेले जानकारी दिए । 
हेटौंडा उपमहानगर र मनहरी गाउँपालिका कार्यक्षेत्र रहेको सहकारीमा एक हजार ८ सय ७ जना शेयर सदस्य रहेका छन् । सहकारीले बचत तथा ऋणको कारोबार साथै निर्माण सामाग्री तथा ग्यासकोसमेत व्यावसायिक सेवा प्रदान गर्दै आएको छ । 
सहकारीले बितेको आर्थिक वर्षमा मात्रै एक अर्ब १७ करोड ८८ लाख रुपैयाँको आर्थिक कारोबार गरेको पत्रकार सम्मेलनमा जानकारी गराइएको थियो । हेटौंडा–९ नम्बर वडाध्यक्ष लक्ष्मण भण्डारीको प्रमुख आतिथ्यतामा पत्रकार सम्मेलनको आयोजना गरिएको थियो ।