नेकपा प्रचण्ड–माधव समुहद्वारा आन्दोलनको घोषणा

९ पुस, हेटौंडा । नेपाल कम्युनिष्ट पार्टी(नेकपा) का अध्यक्ष पुष्पकमल दाहाल प्रचण्ड र माधवकुमार नेपाल समूहको केन्द्रीय कमिटी बैठकले संसद विघटनको विरुद्धमा आन्दोलनको घोषणा गरेको छ । 
पौष ७ गतेदेखि जारी केन्द्रीय कमिटी बैठक बिहीबार समापन गर्दै संघर्षको कार्यक्रम घोषणा गरेको हो । बैठकले पार्टी संगठन र पार्टी एकतालाई कमजोर पार्न खोज्ने सबै प्रकारका प्रवृतिका विरुद्ध र संसद विघटनको विरुद्ध संघर्ष गर्ने घोषण गरेको हो । 
पहिलो चरणको संघर्षका कार्यक्रम घोषणा गरिएको नेकपाका प्रवक्ता नारायणकाजी श्रेष्ठले जानकारी दिए ।
बैठकले पौष १० गते बिहान साढे नौ बजे सबै केन्द्रीय सदस्य, सासंदहरू लगायतका नेताहरुको उपस्थितिमा विशेष कार्यक्रम सञ्चालन गर्ने, सोही दिन दिउँसो २ बजे अध्यक्षद्धयको तर्फबाट पत्रकार सम्मेलन गर्ने, पुष ११ गते प्रदेश कार्यालयको संयोजनात्मक छलफल हुने र एक हप्ताभित्र प्रदेश समितिको बैठक सम्पन्न गर्ने निर्णय गरेको छ । 
यस्तै पुष १२ गते ७७ जिल्लाहरूमा बैठक सञ्चालन गर्ने तथा जिल्ला स्तरिय कार्यकर्ता भेला सम्पन्न गरी पार्टीलाई सशक्त बनाउदै एकताविरुद्धका भ्रमलाई चिर्ने र कसरी संघर्षका कार्यक्रम अघि बढाउने भन्ने सम्बन्धमा अभिमुखिकरण कार्यक्रम सञ्चालन गर्ने प्रवक्ता श्रेष्ठले बताए ।
बैठकले पुष १४ गते सम्पूर्ण जिल्लामा संसद विघटनको विरुद्धमा बिरोध प्रदर्शन गर्ने निर्णय पनि गरेको छ । पुष १४ गतेसम्ममा सबै जनवर्गिय संगठनहरुको केन्द्रीय बैठक तथा भेलाको आयोजना गर्ने, पुष २० गतेभित्र नगरपालिका र गाउँपालिका स्तरमा बैठक, भेला गर्ने र पुष २५ गतेभित्र सबै वडाहरूमा बैठक आयोजना गर्ने पनि प्रवक्ता श्रेष्ठले जानकारी दिए ।
संघर्षको कार्यक्रमलाई व्यवस्थित बनाउन प्रवक्ता नारायणकाजी श्रेष्ठको संयोजकत्वमा २५ सय एक सदस्यीय केन्द्रीय संघर्ष समिती र उक्त समितिको सचिवालय पनि गठन गरेको छ ।