हेटौंडा उपमहानगरपालिकामा साढे ३ बर्षपछि लेखा समिति, तैपनि जुटेन सहमति

९ पुस, हेटौंडा । हेटौंडा उपमहानगरपालिकामा ३ बर्ष ६ महिनापछि लेखा समिति गठन भएपनि सहमति जुट्न सकेको छैन ।
स्थानीय तहको गठन भएसंगै लेखा समिति गठन गर्नुपर्ने भएपनि मेयर हरिबहादुर महतको उदासिनताका कारण समिति गठन हुन सकेको थिएन । तर मंसिर १६ गते बसेको नगर कार्यपालिका बैठकले लेखा समिति गठन गरेपनि यसमा सहमति जुट्न नसकेको हो । 
हेटौंडा वडा नम्बर ६ की वडा सदस्य शुभद्रा तिमल्सिना संयोजक र अन्य २ जना नेकपाका जनप्रतिनिधि राखेर लेखा समिति गठन गरेको मेयर महतले कार्यपालिका बैठकलाई जानकारी दिएको हेटौंडा वडा नम्बर ६ का अध्यक्ष अर्जुनप्रसाद चौलागाईले बताए । निर्णय भएको दिन कार्यपालिका सदस्य नभएका कारण उनी बैठकमा उपस्थित थिईनन् । उनलाई उपमहानगरपालिका कार्यालयबाट पछि जिम्मेवारी दिईएकोबारे जानकारी दिईएको थियो ।
 तर तिमल्सिनाले आफुले जिम्मेवारी लिन नसक्ने जानकारी मेयरलाई गराएपछि मेयरले यसबारे सोच्ने बताएको स्रोतले जानकारी दिएको छ । तिमल्सिनाले ढिलो गरी समिति गठन गरेको र आफु लेखासम्बन्धी जानकार नभएकाले समितिमा बस्न नसक्ने मेयरलाई जानकारी गराएको जनाईएको । 
उपमहानगरपालिकामा भएका आर्थिक गतिविधिको पारदर्शिता जाँचका लागि गठन गरिने लेखा समिति प्रतिपक्षीलाई दिने प्रचलन छ । मेयर र उपमेयर दुबै नेकपाका भएकाले लेखा समिति संयोजक अन्य पार्टीलाई दिनुपर्ने हुन्छ । नेपाली कांग्रेसलाई दिंदा ३ बर्षसम्म भएका आर्थिक गतिविधि राम्ररी केलाएर समस्या उत्पन्न हुन सक्ने आशंकाले राप्रपाबाट जिल्लामै निर्वाचित एकमात्रै जनप्रतिनिधि तिमल्सिनालाई मेयर महतले संयोजक बनाएको एक जनप्रतिनिधिले बताए । उनलाई ढिलो गरी गठन गरेको समितिमार्फत ३ बर्षको हिसाव अनुमोदन गराउन खोजिएको भन्दै जिम्मेवारी नलिन अन्य जनप्रतिनिधिहरुले सुझाव दिएका छन् ।
‘हामीले शुरुदेखि नै लेखा समिति गठनका लागि माग गरेका थियौं’–हेटौंडा वडा नम्बर ६ का अध्यक्ष चौलागाईले भने–‘तर ३ बर्ष ६ महिनापछि गठन गर्नु बदनियतपूर्ण छ ।’ कांग्रेसको नेतृत्वमा लेखा समिति गठन गरे मनोमानी ढंगबाट भएका खर्चको हिसाव बाहिरिने डरमा मेयर महत रहेको उनको दावी छ । उनले चालु बर्षको बजेट तयार गर्नु अघि नै आफुहरुले अवरोध गर्न खोजेपछि मेयर महतले कांग्रेसबाट निर्वाचित जनप्रतिनिधिले उठाएका विषय सम्बोधन गर्ने प्रतिवद्धता व्यक्त गरेपनि महत पुनः प्रतिवद्धताबाट भागेको आरोप लगाए । 
उनले अघिल्लो कार्यपालिका बैठकमा आफुले विभिन्न विषयमा जवाफ मागेको बताउँदै उनले आगामी बैठकमा जवाफ नआए आफुहरुले पत्रकार सम्मेलनमार्फत विषयहरु सार्वजनिक गर्ने चेतावनी दिएका छन् ।