भिमफेदी-२ कालिटार स्थित कालिका चण्डीका सामुदायिक वनको २१ औं वार्षीक साधारण सभा सम्पन्न

१८ पुस,हेटौँडा । भिमफेदी-२ कालिटारमा रहेको कालिका चण्डीका  सामुदायिक वन उपभोक्ता समूहको २१ औं वार्षीक साधारण सभा सम्पन्न  भएको छ। 

वन उपभोक्ता समूहका अध्यक्ष सिवराम थापाको सभाध्यक्षता तथा  डिभिजन वन कार्यालय राप्तीका वन अधिकृत दिनेश हुमागाईंको  प्रमुख आतिथ्यतामा भेला सम्पन्न भएको हो।भेलामा समुहकी सचिव नानीमाया रानाले बार्षिक प्रगति  प्रतिवेदन र समुहका कोषाध्यक्ष  प्रकाश थापाले आर्थिक वर्ष २०७६।७७ को ४ लाख ८५ हजार बराबरको यथार्थ आर्थिक प्रतिवेदन र चालु आर्थिक वर्षको २०७७।७८ को  ७ लाख ५१  हजारको बराबरको  अनुमानित आय व्यय विवरण प्रस्तुत गरेका थिए।

 भेलामा सव-डिभिजन कार्यालय भैसेका सहायक वन अधिकृत सिताराम अधिकारी,भिमफेदी गाउँपालिका वडा नम्बर-२ का वडा सदस्य रेनुमाया थापा,कालिप्रसाद गण भैसैका सह-सेनानी नविन मल्ल,फेकोफन मकवानपुरका सचिवालय सदस्य सम्भु प्रसाद न्यौपाने,वन समुहकी उपाध्यक्ष अप्सरा लामा लगायतकाले मन्तव्य व्यक्त गरेका थिए।

साथै समुहको आज भएको २१ औ बार्षिक  साधारण सभा मार्फत  ७३ बर्षीया गोपिनि पिथाकोटी र ७३ बर्षीय कृष्ण बहादुर पाख्रिनलाई  जेष्ठ उपभोक्ता सम्मानबाट सम्मानित गरिएको छ। त्यसैगरी वन उपभोक्ता समूहले भिमफेदी-२ आँपचौरमा रहेको  विरुवा महिला समुहलाई नगद ५ हजार सहित पुरस्कृत गरेको छ।