प्रधानमन्त्री र राष्ट्रपतिलाई हटाउने तानाबानापछि संसद विघटनः पोखरेल

२५ पुस, हेटौंडा । उपप्रधानमन्त्री इश्वर पोखरेलले प्रधानमन्त्री केपि शर्मा ओली र राष्ट्रपति विद्यादेवी भण्डारीलाई पदबाट हटाउने तानावाना बुनेपछि संसद विघटन गरिएको बताएका छन् । 
शनिबार मकवानपुरमा आयोजित ओली पक्षीय कार्यकर्ता भेटघाट कार्यक्रममा बोल्दै उनले संसदीय दलको नेता रहेका ओलीलाई संसदको विशेष अधिवेशनमा अविश्वासको प्रस्तावमार्फत हटाउने र राष्ट्रपति भण्डारीलाई महाअभियोगमार्फत हटाउने तानबाना प्रचण्ड–नेपाल खेमाले बुनेपछि ताजा जनादेशका लागि संसद विघटन गरेको बताए । 
कानूनी रुपमा ६४ प्रतिशतको समर्थनमा बनेको प्रधानमन्त्रीलाई निर्णय गर्न नसक्ने अवस्थामा पुर्याएपछि प्रधानमन्त्री केपि शर्मा ओलीले ताजा जनादेशमा जाने फैसला गरेको बताउँदै उनले जनताले निर्वाचनबाट दण्डित वा पुरस्कृत गर्ने बताए । सरकारले बैशाखमा नै निर्वाचन हुने भन्दै यसको तयारी थाल्न कार्यकर्ताहरुलाई आव्हान समेत गरे । प्रथम अध्यक्ष केपि शर्मा ओलीले नेतृत्व गर्नुभएको नेकपा नै आधिकारिक भएकोले ओली नेतृत्वकै नेकपाले सूर्य चिन्ह पाउने उनको दावी छ । 
कार्यक्रममा युवा तथा खेलकुद मन्त्री दावा लामा, बागमती प्रदेशका मूख्यमन्त्री डोरमणी पौडेल, आर्थिक मामिला तथा योजना मन्त्री कैलाश ढुंगेल, प्रदेश सहइन्चार्ज काशीनाथ अधिकारी, जिल्ला सहइन्चार्ज रामेश्वर राना लगायतले नेकपा प्रचण्ड–नेपाल खेमाले गलत गरेको भन्दै कटाक्ष गरेका थिए । 
भेलामा प्रदेशसभा सदस्य समेत रहेका जिल्ला अध्यक्ष मुनु सिग्देल र सचिव प्रेमबहादुर पुलामीलाई पार्टी हित विपरित काम गरेको भन्दै पार्टीबाट निस्कासन गरेको घोषणा गर्दै एकालाल श्रेष्ठलाई नयाँ अध्यक्ष घोषणा गरिएको थियो ।