खुला मञ्चमा आफुसँग संविधान पढ्न प्रधानमन्त्रीलाई गगन थापाको चुनौती 

२६ पुस, हेटौंडा । नेपाली कांग्रेसका नेता गगन थापाले प्रधानमन्त्री केपी शर्मा ओलीलाई आफुसँग खुला मञ्चमा संविधान पढ्न चुनौती दिएका छन् । 
संसद विघटनको विरोधमा नेपाली काँग्रेसले गरेको विरोध सभालाई सम्बोधन गर्ने क्रममा भक्तपुरमा नेता थापाले संसद विघटन गर्ने प्रधानमन्त्री केपी शर्मा ओलीको कदम असंबैधानिक भएको दावी गरे ।
उनले प्रधानमन्त्री केपी ओली क्रान्तिकारी नभई संसद छाडेर भागेको भगौडा भएको टिप्पणी गरे । नेता थापाले संसदको सामना नगर्ने तर अदालतलाई प्रभावित गर्न आफुसँग ६४ प्रतिशत मत भएकाले अर्को सरकार बन्न नसक्ने भन्दै प्रधानमन्त्रीले सरासर झुठ बोलेको दावी गरे ।
नेपालको संविधानमा पाँच वर्षअघि प्रतिनिधि सभा विघटन गर्ने कुराको कल्पनासमेत नगरिएको बताउँदै नेता थापाले प्रधानमन्त्रीको कदम असंवैधानिकको साथै अनधिकृत रहेको दावी गरे ।
संविधानमा नलेखेको कुरा सार्वजनिक पदाधिकारीले गर्न नपाउने भन्दै नेता थापाले राष्ट्रपति र प्रधानमन्त्रीले संविधानले अधिकार दिएको बाहेक केही गर्न नपाइने बताए ।
सर्वोच्च अदालतले संविधान पल्टाएर हेरि फैसला गर्नुपर्ने र अदालतप्रतिको आस्था कायम राख्नुपर्ने उल्लेख गर्दै नेता थापाले प्रधानमन्त्री ओलीले अदालतमाथि मनोवैज्ञानिक दबाब सिर्जना गरेको भन्दै अदालत डराउँदैन भन्ने प्रमाणित गर्नुपर्ने र प्रतिनिधि सभा पुनर्स्थापना गरेर राष्ट्रपति र प्रधानमन्त्रीलाई घर पठाउनुपर्ने बताए ।