साथीको हत्या आरोपमा टिष्टुङका ठकुरी पक्राउ

सांकेतिक तस्विर

२७ पुस, काठमाडौं । नेपाल प्रहरीले साथीको हत्या गरेको आरोपमा मकवानपुरको थाहा नगरपालिका टिष्टुङका एक युवकलाई पक्राउ गरेको छ । 
पक्राउ पर्नेमा टिष्टुङका राजसिंह ठकुरी रहेका छन् । उनलाई आफ्नै साथी काठमाडौं बूढानीलकण्ठ–६ का सुशील तामाङको हत्या आरोपमा पक्राउ गरिएको हो । फरार रहेका ठकुरीलाई महानगरीय प्रहरी परिसर काठमाडौंले चितवनबाट पक्राउ गरेको प्रहरीले जनाएको छ ।
चार  दिनअघि बूढानीलकण्ठमा रहेको छैलुङ गुम्बा नजिकै भएको दुई समूहबीचको झडपमा चुक्कु प्रहारबाट घाइते भएका तामाङको उपचारको क्रममा आइतबार साँझ त्रिवि शिक्षण अस्पताल, महाराजगञ्जमा मृत्यु भएको महानगरीय प्रहरी परिसर काठमाडौंका एसएसपी अशोक सिंहले जानकारी दिए । बुढानिलकण्ठमाथि चिसेनी डाँडामा संगै ‘खानपिन’ गरेका उमेश तामाङ र ठकुरीबीच केटी साथीको विषयमा विवाद भएको थियो । उमेशकी पूर्वप्रेमिका ठकुरीसंग प्रेममा रहेको विषयमा विवाद भएको थियो । विवादमा उमेशले आफ्नो अन्य साथीलाई बोलाएका थिए । 
गन्तव्यतर्फ जाने क्रममा उमेशले बोलाएका युवाहरुसंग हात्तिगौडामा पुनः झगडा हुँदा ठकुरीले प्रहार गरेको चक्कु आफ्नै मिल्ने साथी सुशिल तामाङलाई लागेको प्रहरीको प्रारम्भिक अनुसन्धानले देखाएको छ । घटनाबारे थप अनुसन्धान भईरहेको एसएसपी सिंहले जानकारी दिए ।