अटोमा भएको आगजनीप्रति कांग्रेस मकवानपुरको ध्यानाकर्षण, दोषीलाई कारवाहीको माग

३ माघ, हेटौंडा । मकवानपुरको मनहरी-३ पाल्दमारमा नेपाली कांग्रेसको विरोध कार्यक्रमको प्रचारका लागि प्रयोग गरिएको अटोमा भएको आगजनीप्रति नेपाली कांग्रेस मकवानपुरले गम्भीर ध्यानाकर्षण भएको जनाएको छ ।
नेपाली कांग्रेस मकवानपुरका सभापति इन्द्रबहादुर बानियाँले प्रेस विज्ञप्ति जारी गर्दै शुक्रबार राति भएको घटनाप्रति गम्भिर ध्यानाकर्षण भएको जनाएका हुन् ।
विज्ञप्तिमा 'लोकतन्त्रमा सबैलाई आफ्नो अभिव्यक्ति दिने, विरोध प्रदर्शन गरि सरकारको गलत कामविरूद्ध खबरदारी गर्ने अधिकार संविधानले नै सुरक्षित गरेको अवस्थामा प्रचारप्रसारका लागि प्रयोग भएको अटोमाथि रातको समयमा कायरतापूर्ण ढंगले आगजनी गरिएकोमा नेपाली कांग्रेस मकवानपुर घोर भत्सर्ना गर्दछ ।
सरकार आफ्नो मूल दायित्वबाट विचलित भइरहेको अवस्थामा भएको यस्तो घटनाले असुरक्षा र अशान्तिको अवस्था सिर्जना गरेकाले घटनामा संलग्नको यथाशीघ्र पहिचान गरि कारवाहीका लागि प्रशासनसंग नेपाली कांग्रेस मकवानपुर जोडदार माग गर्दछ । साथै शान्ति सुरक्षा र अमनचयन कायम गर्नेतर्फ प्रहरी प्रशासनलाई चनाखो रहन र आगामी दिनमा जनताको जनधनको सुरक्षामा गम्भीर हुन सचेत समेत गराउँदछ ।'-उल्लेख छ ।
 शुक्रबार राति मनहरी-३ पाल्दमारमा स्थानीय राजु रानाभाटले घर आगाडि पार्किङ गरेर राखेको ना २ ह ४०५० नम्बरको अटोमा अज्ञात समूहले आगजनी गर्दा अटो पुर्ण रुपमा जलेको मकवानपुर प्रहरीले जनाएको छ ।