कांग्रेस मन्त्रीको नाम टुंगियो

१० साउन, काठमाडौं । नेपाली कांग्रेसमा मन्त्री बन्नेहरूको नाम टुंगो लागेको छ । नाम टुंगिएसंगै अब मन्त्रीपरिषद विस्तार हुने भएको छ । स्रोतहरूका अनुसार बुधबार मन्त्रीपरिषद विस्तार हुनेछ ।

पार्टीबाट मन्त्री बनाउने नाममा सभापति एवम् प्रधानमन्त्री वरिष्ठ नेता रामचन्द्र पौडेलबीच भागबण्डा मिलेको छ । कांग्रेसले पाउने १३ मध्ये बाँकी १० मन्त्री मध्ये देउवा पक्षबाट ४, वरिष्ठ नेता रामचन्द्र पौडल पक्षबाट ४ जना हुनेछन् भने कृष्ण सिटौला समूह र खुमबहादुर खड्का समूहबाट १/१ जना मन्त्री बन्नेछन् । 

अनलाइन न्यूज पोर्टल पहिलो पोष्टका अनुसार पौडेलले बुझाएका नाममा केन्द्रीय सदस्य रामकृष्ण यादव तथा सांसदहरु यज्ञबहादुर थापा, संजय गौतम र राजन केसी छन् । पौडेलले बुझाएका नाम मध्ये सांसद् गौतम बर्दियाका सभापति, थापा कास्कीका पूर्वसभापति हुन् भने सांसद् केसी माओवादी अध्यक्ष पुष्पकमल दाहाल ‘प्रचण्ड’लाई काठमाडौं १० बाट हराएर निर्वाचित सांसद् हुन् ।

पहिलो चरणमा नाम बुझाइएका बलबहादुर केसी भने पौडेलको सिफारिसमा यो पटक परेका छैनन् । यस्तै पौडेल पक्षबाट मन्त्रीका लागि चर्चामा रहेका सरिता प्रसाईँ र कमला पन्तको नाम सिफारिस नभएसँगै पौडेल पक्षबाट महिला मन्त्री नहुने भएका हुन् । 

त्यस्तै, सभापति तथा प्रधानमन्त्री शेरबहादुर देउवा पक्षबाट चार मन्त्री थपिने भएका छन् । देउवाले बनाउन लागेका मन्त्रीहरुमा मीनबहादुर विश्वकर्मा, अर्जुनप्रसाद जोशी, वीरबहादुर बलायर र अम्बिका बस्नेत छन् । देउवाले आफ्नो पक्षबाट थप्न लागेका सबै मन्त्री केन्द्रीय सदस्य हुन् । महिला संघकी पूर्वअध्यक्ष समेत रहेकी अम्विका कांग्रेसबाट मन्त्री हुनेमा एक्ली महिला हुने भएकी छन् । देउवा पक्षबाट यस अघि चर्चामा रहेका सांसद भरतकुमार शाहको नाम भने परेन । 

सिटौला समूहबाट भीमसेनदास प्रधान र खुमबहादुर समूहबाट मोहनबहादुर बस्नेतको नाम लगभग टुंगिएको छ । कांग्रेसका यस अघिका तीन मन्त्री उपप्रधान तथा शिक्षामन्त्री गोपालमान श्रेष्ठ, अर्थमन्त्री ज्ञानेन्द्रबहादुर कार्की र श्रममन्त्री फर्मुल्लाह मन्सुर देउवा समूहका हुन् ।

डिना को सम्भावना कति ?

मन्त्रीपरिषद विस्तारमा यसपटक केन्द्रीय सदस्य महालक्ष्मी डिना उपाध्यायको नाम चर्चामा रहेको थियो । तर पछिल्लो समय उनको नाम अोझेलमा परेको छ । महिला नेतृहरूमध्ये देउवा खेमाकै प्रभावशाली भएकाले उनी मन्त्री बन्ने करिव निश्चित रहेको मकवानपुरमा चर्चा थियो । केन्द्रमा पनि उनको नाम अघि न‌ थियो ।

तर महिला संघकी पूर्व केन्द्रीय सदस्य अम्विका बस्नेतको नाम देउवा टिममा परेपछि उनको सम्भावना कम भएको एक नेताले बताए । एक पटक राज्यमन्त्री भईसकेकाले उनलाई मन्त्री बनाउनु पर्ने दवावका कारण समस्या परेको जनाइएको छ । 'तर अन्तिम निर्णय भै नसकेकाले उनलाई मन्त्री बनाउने प्रयास जारी रहेको छ ।'-एक नेताले भने ।

चर्चामा रहेका सरिता प्रसाईँ, कमला पन्त, अम्विका बस्नेत र महालक्ष्मी डिना उपाध्यायमध्ये बस्नेतको नाम करिव पक्का भएको जनाइएको छ ।