कांग्रेस बागमती प्रदेश संसदीय दलको बैठकः अविश्वास प्रस्तावबारे छलफल

२५ माघ, हेटौंडा । नेपाली कांग्रेस बागमती प्रदेश संसदीय दलको बैठकमा अविश्वासको प्रस्तावबारे छलफल भएको छ । आइतबार संसदीय दलको सम्पर्क कार्यालय काठमाडौंमा बसेको बैठकमा मूख्यमन्त्री डोरमणि पौडेलविरुद्ध प्रदेशसभामा टेबुल भएको अविश्वासको प्रस्ताव बारे छलफल भएको हो ।
छलफलमा सहभागी प्रदेशसभा सदस्यहरुले मूख्यमन्त्री पौडेलविरुद्ध दर्ता भएको अविश्वासको प्रस्ताव र फागुन ५ गते बस्ने भनिएको प्रदेशसभा बैठकमा चाल्नुपर्ने रणनीतिबारे आफ्नो धारणा राखेका थिए । ‘आइतबारको बैठकमा सहभागी प्रदेशसभा सदस्यहरुले आफ्नो धारणा राख्ने काम भयो ।’–संसदीय दलका सचिव निमा लामाले भने–‘अर्को बैठकमा थप धारणा राख्ने काम हुनेछ ।’ बैठकले हतारमा निर्णय नगरी मतदानको समयसम्म पर्याप्त छलफल गरी निर्णय लिनुपर्नेमा जोड दिएको छ । 
बैठकमा सहभागीहरुले नेपाली कांग्रेसले हतार र हतासमा निर्णय लिनुभन्दा उचित समय आएपछि उचित निर्णय लिनुपर्ने धारणा राखेको सचेतक छिरिङ दोर्जे लामाले बताए । बैठकले संसदीय दलका नेता इन्द्रबहादुर बानियाँलाई नै थप छलफल र समन्वयका लागि जिम्मा दिने निर्णय गरेको छ । 
फागुन ५ गते अघि बस्ने बैठकले थप रणनीतिबारे निर्णय गर्ने जनाईएको छ ।