अब ५ हजारभन्दा बढी चन्दा लिदा उमेदवारले बैंकमार्फत लिनुपर्ने 

१ माघ, हेटौंडा । निर्वाचन आयोगले चुनावमा सहभागी हुने राजनितिक दल वा उमेदवारले पाँचहजारभन्दा बढी चन्दा लिनुपर्ने भए बैंक वा वित्तीय संस्थामार्फत लिनुपर्ने गरी मस्यौदा तयार पारेको छ ।
निर्वाचन आयोगले चुनावमा राजनीतिक दल र उमेदवारले बैंक खाताबाट मात्रै खर्च गर्नुपर्ने प्रावधानसहितको मस्यौदा तयार पार्ने निर्वाचनलाई मितव्ययी, पारदर्शी बनाउन यस्तो प्रावधान ल्याउने भएको हो । 
अबदेखि राजनितिक दल वा उमेदवारहरुले बैंक तथा वित्तीय संस्थामा खाता खोलेर मात्रै निर्वाचनमा खर्च गर्नुपर्ने छ । निर्वाचन खर्चसम्बन्धी आचारसंहितामा दलको विधान बमोजिम आधिकारिक प्रतिनिधिद्वारा खर्च गर्नुपर्ने, आयोगले तोकेकोभन्दा बढी खर्च गर्न नपाउने, खाता सञ्चालन तथा निर्वाचन खर्चको कारोबार पारदर्शी हुनुपर्ने आयोगको प्रस्ताव छ । 
चन्दाको रूपमा नगद लिएमा चन्दा दिने व्यक्ति वा संस्थालाई सो रकम बुझेको रसिद वा भर्पाइ दिनुपर्ने, खर्चको विवरण तथा बिल भर्पाइ अनिवार्यरूपमा राख्नुपर्ने, आम्दानी तथा खर्चको विवरण प्रचलित कानुन बमोजिम आयोगले तोकेको ढाँचामा जिल्ला निर्वाचन कार्यालय वा आयोगमा बुझाउनुपर्ने प्रस्ताव गरिएको छ ।
यस्तै खर्चको विवरण सन्तोषजनक नदेखिएमा आयोगले उक्त खर्चको बिल भर्पाइ तथा बैंक वा वित्तीय संस्थामा रहेको खाताको विवरण पेस गर्न आदेश दिएमा सम्बन्धित राजनीतिक दलले सक्कल बिल भर्पाइ तथा बैंक वा वित्तीय संस्थाको खाताको विवरण पेश गर्नुपर्ने आचारसंहिताको मस्यौदामा उल्लेख छ ।