नेपाली कांग्रेसको नयाँ महाधिवेशन कार्यतालिका

६ फागुन, काठमाडौं । नेपाली कांग्रेसको १४ औँ महाधिवेशनको नयाँ कार्यतालिका सार्वजनिक गरिएको छ ।
बुधबार बेलुका पार्टी कार्यालय सानेपामा बसेको केन्द्रीय कार्यसमितिको बैठकले आउँदो भदौ ७ देखि १० गतेसम्म महाधिवेशन गर्ने प्रस्ताव गर्दै त्यसअनुसार नयाँ कार्यतालिका सार्वजनिक गरेको हो ।
कांग्रेसले विधानअनुसार पाँच वर्ष महाधिवेशेन गर्न नसकेपछि संविधानको धारा २६९ ले दिएको थप ६ महिनाको कार्यकाल थप गरेर भदौमा महाधिवेशन गर्ने निर्णयमा पुगेको प्रवक्ता विश्वप्रकाश शर्माले जानकारी दिए । 
सार्वजनिक नयाँ कार्यतालिका अनुसार समायोजन हुन बाँकी रहेका जिल्लाको अन्तरिम संरचना फागुन १५ गतेभित्र समायोजन भइसक्नु पर्नेछ । फागुन २८ गतेभित्र सबै जिल्लाले क्रियाशील सदस्यता नवीकरण तथा नयाँको टुंगो लगाइसक्नुपर्नेछ र असार ७ गतेभित्र केन्द्रीय कार्यसमितिले देशभरबाट आएका क्रियाशिल सदस्यताको निर्णय गर्ने मुख्यसचिव कृष्णप्रसाद पौडेलले जानकारी दिए ।
पारित नयाँ महाधिवेशन कार्यतालिका अनुसार गाउँ/नगर वडा अधिवेशन असार २० गते, गाउँ/नगरपालिकाको अधिवेशन असार २२, प्रदेशसभा क्षेत्रीय अधिवशेन असार २५, एक मात्र प्रतिनिधिसभा क्षेत्रीय अधिवेशन असार २७ गते हुनेछ।
एक भन्दा बढी प्रतिनिधि सभा निर्वाचन क्षेत्र भएको जिल्ला अधिवेशन असार ३० गते, प्रदेश तहको अधिवेशन साउन ६ गते हुने भने केन्द्रीय महाधिवशेन भदौ ७ गते हुने भएको छ ।