कार्यविधि नहुँदा संसद चलाउन समस्याः सभामुख श्रेष्ठ

७ फागुन, हेटौंडा । बागमती प्रदेशसभाका सभामुख सानुकुमार श्रेष्ठले प्रदेशसभामा अविश्वासको प्रस्तावबारे निर्णय गर्ने कार्यविधि नबनेकोले प्रदेशसभा संचालन गर्न समस्या भएको बताएका छन् । 
सूचना टाँसेर २ पटक प्रदेशसभा बैठक स्थगित गरेपछि चौतर्फी आलोचना खेपिरहेका सभामुख श्रेष्ठले प्रदेशसभा सचिवालयमा पत्रकार सम्मेलन गरी यस्तो बताएका हुन् । उनले मूख्यमन्त्री डोरमणि पौडेलविरुद्ध संसदमा टेबुल भएको अविश्वासको प्रस्तावबारे निर्णय गर्न कार्यविधि मस्यौदा समिति गठन गरेको र समितिले प्रतिवेदन नबुझाएका कारण संसद स्थगित गर्नु परेको बताए । 
आफुले राजनैतिक पूर्वाग्रह राखेर संसद स्थगित गरेको नभई कार्यविधि तयार भई नसकेको र नेपाली कांग्रेसले पनि समय मागेकाले सूचना टाँसेर स्थगित गर्नु परेको उनको दावी छ ।
आफु भूमिकाबारे संचारमाध्यम र अन्यत्र प्रश्न उठेकाले प्रष्ट पार्न पत्रकार सम्मेलन गर्नु परेको उनको भनाई छ । सबैको सहमतिमा आफु सभामुख भएको बताउँदै उनले आफुले कुनै दलको पछि लागेर पूवाग्रही हुनुपर्ने आवश्यक नरहेको बताए ।
तर मंगलबार सभामुखसंग सत्तापक्ष, प्रमुख प्रतिपक्ष र अविश्वासको प्रस्ताव पक्षबीच भएको छलफलमा संसदमा टेबुल भएको अविश्वासको प्रस्तावमाथिको छलफल अघि बढाउने सहमति भएको जनाईएको छ । कार्यविधि मस्यौदा समितिका संयोजक छिरिङदोर्जे लामाले यसअघि नै सबै दलको सहमतिमा कार्यविधि तयार भईसकेको र बुझाउन खोज्दा सभामुख श्रेष्ठले बुझ्न नमानेको बताईसकेका छन् ।

यो पनि पढ्नुस्
सभामुखले कांग्रेसले समय मागेको बहाना बनाउनु गलतः बानियाँ