सभामुख श्रेष्ठको अभिव्यक्तिप्रति कार्यविधि मस्यौदा समितिको आपत्ति

८ फागुन, हेटौंडा । अविश्वासको प्रस्ताव कार्यविधि नबन्दा प्रदेशसभा संचालन गर्न समस्या परेको भन्ने बागमती प्रदेशसभाका सभामुख सानुकुमार श्रेष्ठको अभिव्यक्तिप्रति अविश्वासको प्रस्ताव कार्यविधि मस्यौदा समितिले आपत्ति जनाएको छ । कार्यविधि मस्यौदा समितिका संयोजक छिरिङदोर्जे लामाले सामाजिक सञ्जाल फेसुकमार्फत प्रतिक्रिया दिंदै बागमती प्रदेशसभा स्थगित भईरहेको विषयमा अविश्वासको प्रस्ताव कार्यविधि मस्यौदा समितिलाई जोडेर सभामुख सानुकुमार श्रेष्ठले दिएको अभिव्यक्तिप्रति आपत्ति जनाएका हुन् ।
उनले बागमती प्रदेशसभाको कार्यव्यवस्था परामर्श समितिले सो समितिकै ८ जना माननीय सदस्यहरु समिति सदस्य र प्रदेशसभा सचिवालय सचिव कार्यविधि समितिको सचिव रहने गरि माघ ६ गते मस्यौदा समिति गठन गरेको र सो समितिले कार्यविधि मस्यौदा तयार गरि कार्यव्यवस्था परामर्श समितिको बैठकमा पेश गर्ने निर्णय भएको जनाएका छन् । ‘सोहि अनुरूप समितिले मस्यौदा तयार गरिसकेको विषय सभामुख सानुकुमार श्रेष्ठ र सचिवालयलाई जानकारी गराईसकेको र सभामुख ज्यूलाई प्रतिवेदन बुझाउनका लागि पटक पटक कार्यव्यवस्था समितिको बैठक बोलाउन आग्रह गर्दा वेवास्ता गरिएकोमा कार्यविधि समितिलाई दोष देखाउनु निन्दनीय छ ।’–लामाले भनेका छन् ।
सभामुख श्रेष्ठले विहिबार प्रजातन्त्र दिवसको अवसर पारेर गरेको पत्रकार सम्मेलन गरी कार्यविधि तयार नभएकाले बैठक बोलाउन समस्या परेको भन्दै प्रदेशसभा संचालन नहुनुको दोष समितिलाई दिएका थिए । ‘कार्यविधि मस्यौदा समितिको संयोजकको हैसियतले अविश्वासको प्रस्ताव सम्बन्धि दस्तखत सहितको मत विभाजन आन्तरिक कार्यविधि मस्यौदा तयार भईसकेको र सभामुख ज्यूलाई कार्यव्यवस्था परामर्श समितिको बैठक राखी प्रतिवेदन बुझाउने वातावरण तयार गर्न समितिको तर्फबाट माग समेत गर्दछु ।'–लामाले भने ।
उनले कार्यविधिको कारणले अविश्वासको प्रस्ताव माथि छलफल अघि वढाउन कुनै अवरोध नहुने कुरा स्मरण गराउँदै कार्यव्यवस्था परामर्श समिति र प्रदेशसभा बैठक बस्न नसक्नुमा समितिको कुनै पनि भूमिका नरहेको प्रष्ट परेका छन् ।