सरकार र विप्लव समुहबीच आज पनि वार्ता हुने

२० फागुन, हेटौंडा । नेपाल सरकार र प्रतिबन्धित नेत्रविक्रम चन्द विप्लव समुहबीच बुधबारबाट सुरु भएको वार्ताले आज पनि निरन्तरता पाउँने भएको छ ।
बुधबार विहान र साँझ गरी दुई चरणको वार्ता गरेको सरकार र चन्द समुहबीच आज निर्णायक वार्ता गर्ने तयारी भइरहेको सरकारी वार्ता टोलीले जानकारी दिएको छ । तर वार्ताको समय र स्थान भने खुलाइएको छैन । 
बुधबार भएको वार्ता सकारात्मक दिशातर्फ उन्मुख भएको सरकारी वार्ता टोलीले जानकारी दिएको छ । वार्तामा विप्लव पक्षसँग रहेको हतियार बुझाउनेदेखि वैधानिक आन्दोलनमा आउने विषयमा हस्ताक्षर गर्नुपर्ने सरकारी पक्षको धारणा छ भने विप्लवका प्रतिनिधिले भने प्रतिबन्ध फुकुवा र बन्दी नेता, कार्यकर्ता रिहाइसहित माग राखेको छ । 
राजनीतिक रुपमा संसदीय व्यवस्था कि वैज्ञानिक समाजवाद भन्नेमा जनमत संग्रह, संयुक्त राष्ट्रिय सरकार गठन र त्यसका लागि सर्वपक्षीय भेलाको प्रस्ताव उसले अघि सारेको छ । 
वार्तामा सरकारका तर्फबाट गृहमन्त्री रामबहादुर थापा बादल र प्रधानमन्त्रीका परराष्ट्र सल्लाहकार राजन भट्टराई तथा विप्लव समूहका तर्फबाट कार्यालय सदस्य खड्गबहादुर विश्वकर्मा र केन्द्रीय सदस्य उदयबहादुर चलाउने सहभागी भएका थिए ।