यसकारण विकेशलालको मकवानपुर उद्योग वाणिज्य संघको सदस्यमा उम्मेदवारी

विकेशलाल श्रेष्ठ

४ चैत, हेटौंडा । विनय एण्ड विकेश सप्लायर्सका संचालक युवा व्यवसायी विकेशलाल श्रेष्ठले मकवानपुर उद्योग वाणिज्य संघको सदस्यमा उम्मेदवारी दिने घोषणा गरेका छन् । उनले मकवानपुर उद्योग वाणिज्य संघको आसन्न निर्वाचनमा वाणिज्यतर्फको सदस्य पदमा उम्मेदवारी दिने घोषणा गरेका हुन् ।

श्रेष्ठले उद्योगी व्यवसायी तथा उपभोक्ताको हकहितका काम गर्ने प्रतिवद्धतासहित ८ बुँदे चुनावी घोषणापत्र सार्वजनिक गरेका छन्।सामाजिक कार्यमा समेत परिचित श्रेष्ठले पहिलो पटक संघको सदस्यमा उम्मेदवारी दिने घोषणा गरेका छन् । उनले आफुले व्यवसायीका समस्या पहिचान गर्दै उनीहरुको हितमा काम गर्ने बताएका छन् । उनले उद्योगी व्यवसायीहरुसंग सहकार्य गर्दै व्यवसायिक र उपभोक्ताहितको क्षेत्रमा काम गर्ने आफ्नो योजना रहेको बताए । उद्योग बाणिज्य संघलाई सबै व्यवसायीको साझा थलोको रुपमा अघि बढाउनेतर्फ आफ्नो सधैं पहल रहने बताउँदै यसलाई सानादेखि ठूला व्यवसायीले उत्तिकै पहुँच राख्ने संख्थाको रुपमा अघि बढाउन आफ्नो पहल रहने उनको भनाई छ ।

व्यवसायिक संस्थामा प्रवेश गरेपछि आफले राजनैतिक आस्था र बिचारबाट भन्दा आम व्यवसायीहरुको सुझाव अनुसार अघि बढ्ने अठोट राखेका छन् । उनले आफुले अहिले पनि आवश्यक पर्दा व्यवसायीको समस्या समाधानमा साथ दिईरहेको बताउँदै संघमा जिम्मेवारी पाए यसलाई निरन्तरता दिने प्रतिवद्धता व्यक्त गरे।मउवा संघलाई प्रविधिमैत्री बनाउने, साना तथा घरेलु उद्योग कार्यालय र आन्तरिक राजस्व कार्यालयमा ३६५ दिन नै हेल्प डेक्सको स्थापना गरी त्यहाँ पुगेका उद्योगी व्यवसायीलाई सहजिकरण गर्न प्रयास गर्ने उनको भनाई छ । करको अज्ञानताका कारण धेरै व्यवसायीहरु मारमा परिरहेको भन्दै उनले व्यवसायीहरुलाई कर सम्बन्धी आधारभूत र विशेष तालिम निःशुल्क उपलब्ध गराउनेतर्फ आफुले अग्रसरता लिने बताए । घरधनी, घरबहालमा बस्ने र सरोकारवाला निकायसंगको अन्तरक्रियामार्फत घर बहाल कर सम्बन्धी समस्या समाधान गर्न घर बहाल कर सम्बन्धित घरधनीले भुक्तानी गर्नुपर्ने प्रचलित नियमलाई कार्यान्वयनका लागि पहल गर्ने उनको भनाई छ ।

व्यवसायिक समानता र एकरुपता कायम गर्ने, व्यवसायीलाई उपभोक्ताप्रति जिम्मेवार बनाउने, समयसमयमा अनुगमन गर्ने र सहयोग सुझाव प्रदान गर्ने, व्यवसायीलाई पर्ने गरेका प्रशासनिक जटिलता अन्त्य गर्नको लागि पहल गर्ने उनको दावी छ । संघको ५४ औँ साधारणसभा चैत २१ गते र निर्वाचन तालिका २३ गतेका लागि तय भएको छ ।