शहीद स्मृति गोल्डकपः आयोजक मकवानपुर ११ र आर्मीबिच शनिवार फाइनल भिडन्त

६ चैत, हेटौंडा । हेटौँडामा जारी स्थानीय तह शहीद स्मृति गोल्डकप अन्तराष्ट्रिय फुटबल प्रतियोगिताको उपाधिका लागी भोली शनिवार आयोजक मकवानपुर ११ र विभागीय टोली नेपाल आर्मि फुटबल क्लब आमनेसामने हुँदैछन् ।
साबिक विजेता आयोजक मकवनपुर ११ र विभागीय टोली आर्मीका प्रशिक्षकले जारी तेस्रो संस्करणको उपाधि जित्ने दाबी गरेका छन् । शुक्रबार भएको प्रि–म्याच कन्फ्रेन्समा दुवै क्लबका प्रतिशक्षकले उपाधि जित्ने दावी गरेका हुन् । 
आयोजक मकवानपुरका टिम व्यवस्थापक युवराज लामाले स्थानिय र राष्ट्रिय खेलहरुसमेत खेलिसकेका खेलाडीहरुको समिश्रणबाट नतिजा आफनो पक्षमा आउँने विश्वास व्यक्त गरे । उनले ए डिभिजन लिग विजेता मच्छिन्द्रलाई हराएका कारण पनि आफनो टिमका खेलाडीहरुको हौसला उच्च रहेको बताए । 
यस्तै टिम प्र्रशिक्षक विजयलाल श्रेष्ठले घरेलु मैदान र घरेलु समर्थकको साथले पनि आफुहरुलाई खेल जित्न पे्ररित गर्ने दावी गरे । 
यसैगरी आर्मीका टिम म्यानेजर चुनबहादुर थापाले विदेशी टिमलाई हराउँदाको उच्च मनोबल उपाधि जित्ने एउटा आधार भएको बताउँदै आफनो टिममा खेलाडीहरु फिट र लयमा रहेकाले पनि उपाधि जित्ने दावी गरे । 
यद्यपि खेलमा जित र हारको दुबै संभावनालाई भने नकार्न नसक्ने उनको भनाई थियो । उनले आफुहरुको लक्ष्य भने हेटौंडाबाट उपाधि लिएरै जाने रहेको बताए । 
आर्मीका कप्तान टेकबहादुर बुढाथोकीले फरेष्ट्रीको खेल मैदानमा यसअघि तीन वटा फाइनल खेलिसकेको र दुई वटामा विजयी भएको स्मरण गर्दै यस मैदानमा तेस्रो पटक उपाधि उचाल्ने दावी गरे । 
प्रतियोगिताको फाइनल यात्रा तय गर्ने क्रममा पहिलो सेमिफाइनल खेलमा आर्मीले विदेशी क्लब अफ्रिकन रुट्स एसोसिएसन (अरास) डुवल क्यामरुनलाई १–० गोल अन्तरले हराएको थियो भने आयोजक मकवानपुर ११ ले ए डिभिजन लिग विजेता मच्छिन्द्रलाई ४–३ गोल अन्तरले पराजित गरेको हो । 
हेटौंडाको वनविज्ञान अध्ययन संस्थान (फरेष्ट्री) को खेल मैदानमा शनिवार २ बजे सुरु हुने फाइनल खेलको विजेता टिमले नगद रु १० लाख र उपविजेता टिमले नगद ५ लाख पुरस्कार प्राप्त गर्ने छन् ।
यस्तै प्रतियोगिताको सर्वोत्कृष्ट खेलाडीलाई ५ लाख ५० हजार बराबरको बुलेट बाइक प्रदान गरिने छ भने विधागत उत्कृष्ट खेलाडी र प्रशिक्षकलाई जनही नगद २५ हजार पुरस्कार प्रदान गरिने आयोजकले जनाएको छ ।