प्रतिनिधि सभाको बैठक १० गतेसम्मका लागि स्थगित

७ चैत, हेटौंडा । प्रतिनिधि सभाको बैठक आउँदो १० गतेसम्मका लागि स्थगित भएको छ । बैठक १० गते मंलबार दिउँसो १ बजे बस्नेगरी स्थगित भएको हो । 
शुक्रवारको बैठकमा लोक सेवा आयोग र राष्ट्रिय मानव अधिकार आयोगको वार्षिक प्रतिवेदन पेस भएका छन् । बैठकमा प्रधानमन्त्री केपी शर्मा ओलीका तर्फबाट कानुन, न्याय तथा संसदीय मामिला मन्त्री लीलानाथ श्रेष्ठले लोक सेवा आयोगको ६१ औँ तथा मानव अधिकार आयोगको वार्षिक प्रतिवेदन पेस गरेका थिए । यसअघि सभामुख अग्निप्रसाद सापकोटाले प्रस्तुत गरेको विभिन्न मितिमा सम्पन्न भएका बैठकमा सांसद अनुपस्थित भएको सूचनालाई बैठकले स्वीकृत गरेको थियो । 
यस्तै शुक्रवारको बैठकमा विभिन्न दलका नेताले सम्बोधन गरेका छन् । फागुन २३ यता प्रतिनिधि सभाका तीन वटा बैठक बसे पनि कुनै पनि सांसदले सम्बोधन गर्न पाएका थिएनन् । बैठकलाई सम्बोधन गर्दै माओवादी केन्द्रका सांसद पम्फा भुसालले प्रधानमन्त्री केपी शर्मा ओलीको तानाशाहा भएको आरोप लगाईन ।
सङ्घीयता, गणतन्त्र, धर्मनिरपेक्षता, समानुपातिक र समावेशी शासन प्रणाली प्रधानमन्त्री ओलीलाई मन नपर्ने गरेको पनि सांसद भुसालले जनताको पक्षमा सरकारको नेतृत्व गर्न जनताले ओलीलाई प्रधानमन्त्री बनाएपनि उनी तानाशाही बनेको दावी गरिन् ।
यस्तै नेपाली काँग्रेसका सांसद बालकृष्ण खाणले सरकारले कागजको विकास मात्र गरेको टिप्पणी गर्दै विस्तृत परियोजना प्रतिवेदन र बजेटबिना धमाधम सडक, पुल, स्वास्थ्य संस्था आदिको शिलान्यास गरेको बताए । काठमाडौँ उपत्यकामा मेलम्चीको पानी आउनु राम्रो भएपनि तर त्यो सपना पूर्वप्रधानमन्त्री स्वर्गीय कृष्णप्रसाद भट्टराईको सपना भएको भन्दै उनले सरकारले कतै भट्टराईको नाम उल्लेख गर्न कञ्जुस्याइँ गरेको अरोप लगाए ।