काठ सदुपयोग गर्न पाउनुपर्ने भन्दै डिएफओलाई ज्ञापनपत्र

१२ चैत, हेटौंडा । सामुदायिक वन उपभोक्ता महासंघ मकवानपुरले जिल्लाका सामुदायिक वन समूहले वन पैदावार सदुपयोग गर्न पाउनुपर्ने भन्दै विहिबार वन कार्यालयमा ज्ञापनपत्र बुझाएको छ ।
महासंघको नेतृत्वमा डिभिजन वन कार्यालय मकवानपुरका प्रमुख इमानाथ पौडेललाई काठ कटान, संकलन र विक्रिवितरणको गर्न पाउनुपर्ने भन्दै ज्ञापनपत्र बुझाइएको हो । महासंघको ज्ञापनपत्र बुझ्दै डिभिजनल वन अधिकृत पौडेलले काठ कटान फुकुवा गर्न बागमती प्रदेश उद्योग, पर्यटन वन तथा वातावरण मन्त्रालयमार्फत प्रयास गर्ने प्रतिवद्धता व्यक्त गरे । उनले आन्तरिक खपतका लागि ढलापढा काठ संकलनमा समस्या नरहेको पनि बताए ।
छलफलमा सहभागी वन समूहका प्रतिनिधिहरुले विभिन्न बहानामा काठ सदुपयोगमा रोक लगाईदा उपभोक्ताको काठको माग पुरा गर्न नसकिएको र वनमा रहेको काठ डढेलो र चोरीनिकासीका कारण जोखिममा रहेकाले यथाशिघ्र सदुपयोग गर्ने व्यवस्था गर्न आग्रह गरेका थिए । 
कार्यक्रममा महासंघ बागमती प्रदेश सदस्य रामहरी चौलागाई, जिल्ला अध्यक्ष साधुराम चौलागाई, हेटौंडा उपमहानगर महासंघ अध्यक्ष शम्भुप्रसाद न्यौपाने, मकवानपुरगढी गाउँपालिका महासंघ अध्यक्ष बलराम अधिकारी लगायत विभिन्न सामुदायिक वनका प्रतिनिधिहरुको सहभागिता रहेको थियो ।