प्रदेश सामाजिक मन्त्रालयद्वारा कोरोना परास्त गर्न सहकार्यका लागि आग्रह

२० बैशाख, हेटौंडा । बागमती प्रदेशको सामाजिक विकास मन्त्रालयले कोरोना भाईरस संक्रमण विरुद्धको अभियानमा सहकार्यका लागि आग्रह गरेको छ ।
मन्त्रालयले सोमबार कारोनालाई परास्त गर्न मन्त्रालयले गरिरहेका कामहरुको बारेमा जानकारी दिंदै यस्तो आग्रह गरेको हो । कार्यक्रममा सामाजिक विकास मन्त्री सरस्वती बस्नेतले सबैको सहकार्यबाट मात्रै कोरोनालाई परास्त गर्न सकिने भएकाले सहयोगका लागि आग्रह गरिन् । उनले मास्क लगाउने, सामाजिक दुरी कायम गर्ने, हात धुने जस्ता स्वास्थ्य मापदण्ड पालना गर्न र पार्टी, सेमिनार, भोजभतेर, सभा जस्ता मानिस जम्मा हुने कार्यक्रम रोक्न आग्रह गरिन् । उनले प्रदेश सरकार प्रदेशमा कोरोनाविरुद्धको अभियानमा दु्रत गतिमा काम गरिरहेको समेत बताईन् । 
सामाजिक विकास राज्यमन्त्री डा. रामकुमार अधिकारी कोरोना विरुद्धको अभियानलाई युद्धको संज्ञा दिंदै यो युद्ध जित्नका लागि स्वास्थ्यकर्मी, संचारकर्मी लगायतका सबै संयन्त्र परिचालन हुनुपर्नेमा जोड दिए । उनले समुदायस्तरबाटै यसलाई परास्त गर्न काम गर्नुपर्नेमा जोड दिंदै रोकनाम र उपचारमा कुनै पनि कमी हुन नदिने दावि गरे । 
कार्यक्रममा सामाजिक विकास मन्त्रालयका प्रवक्ता बरिष्ठ स्वास्थ्य प्रशासक डा. पुरुषोतमराज सेढाईले बागमती प्रदेशमा १ लाख ८३ हजार ३०५ जना कोरोना संक्रमित रहेको जानकारी दिएका थिए । पछिल्लो २४ घण्टामा गरिएको पिसिआर परिक्षणको संक्रमण दर ३७.३६  प्रतिशत रहेको र २४ घण्टामा सबै भन्दा बढी नयाँ संक्रमण देखिएका जिल्लाहरु काठमाडौँ, ललितपुर र भक्तपुर रहेको जानकारी दिए । 
उनका अनुसार प्रदेशभर आइसीयु बेडको संख्या ४१५, आइसीयुमा भर्ना भएको संख्या २८०, भेन्टिलेटर बेडको  संख्या १६० र भेन्टिलेटर बेडमा भर्ना भएको संख्या ९० जना रहेको जानकारी दिए ।