ओली सरकारलाई दिएको समर्थन फिर्ता लिने माओवादी केन्द्रको निर्णय

२२ बैशाख, हेटौंडा । नेकपा माओवादी केन्द्रले प्रधानमन्त्री केपी शर्मा ओली नेतृत्वको सरकारलाई दिएको समर्थन फिर्ता लिने निर्णय गरेको छ । पार्टी मुख्यालय पेरिसडाँडामा मंगलबार बसेको माओवादीको स्थायी कमिटी बैठकले समर्थन फिर्ता लिने निर्णय गरेको हो । 
मंगलबार बैठक सकिदा पाँच बजिसकेकाले सरकारलाई दिएको समर्थन फिर्ताको पत्र आज बुधबार बुझाइने नेताहरुले बताएका छन् ।  यसअघि, माओवादीले समर्थन फिर्ता लिने निर्णय गर्ने जिम्मा अध्यक्ष पुष्पकमल दाहाल प्रचण्डलाई दिएको थियो ।
नयाँ सत्ता समीकरण बनाउन नेपाली काँग्रेस र जनता समाजवादी पार्टीसँग भएको छलफल टुङ्गोमा नपुगेपछि पार्टीले समर्थन फिर्ता लिन सकेको थिएन ।  तर, प्रधानमन्त्री केपी ओलीले आगामी वैशाख २७ गते विश्वासको मत लिने निर्णय गरेपछि पार्टीले बैठक बसेर समर्थन फिर्ता लिने औपचारिक निर्णय गरेको हो ।
यसैगरी प्रतिनिधिसभाको विशेष अधिवेशनको उद्देश्य राम्रो नरहेको निष्कर्ष माओवादीले निकालेको छ । माओवादीका प्रवक्ता नारायणकाजी श्रेष्ठले आफूहरूले प्रधानमन्त्रीले चैत २३ भित्रै विश्वासको मत लिनु पर्ने बताए पनि संसदको बजेट अधिवेशन बोलाउनु पर्ने बेलामा विशेष अधिवेशन बोलाएको भन्दै प्रधानमन्त्रीकोे राजनीतिक आशय राम्रो नदेखिएको टिप्पणी गरे ।