युरोकपः रोनाल्डोको दुईगोलसँगै पोर्चुगलको विजयी सुरुवात

२ असार, हेटौंडा । साविक विजेता पोर्चुगलले १६ औं संस्करणको युरोकप फुटबलमा विजयी सुरुवात गरेको छ । मंगलबार भएको खेलमा समूह चरणको पहिलो खेलमा हंगेरीलाई ३–० गोल अन्तरले पराजित गर्दै पोर्चुगलले सुखद सुरुवात गरेको हो । 
पोर्चुगललाई जित दिलाउन कप्तान क्रिस्टियानो रोनाल्डोले दुई तथा राफायल गुइरेरोले थप एक गोल गरे । पहिलो हाफमा बराबरी भएको खेलमा तीनै गोल दास्रो हाफको अन्तिम समयमा सम्भव भएको थियो । दोस्रो हाफको अन्तिम १० मिनेटमा हंगेरीले तीन गोल खाएको हो ।   
खेलको ८४ औं मिनेटमा राफायलले गोल गर्दा, क्रिश्चियन रोनाल्डोले ८७ औं र अतिरिक्त समयमा गोल गर्दै पोर्चुगललाई ३–० को जित दिलाए । हंगेरीविरुद्ध दुई गोल गरेसँगै रोनाल्डोले युरोकप फुटबलमा सर्वाधिक गोल गर्ने खेलाडीको कीर्तिमान बनाएका छन् । उनले युरोकपमा ११ गोल गर्दै कीर्तिमान बनाएका हुन् । रोनाल्डोले फ्रान्सका मिचेल प्लाटिनीले बनाएको ९ गोलको कीर्तिमान तोडेका हुन् । 
यस्तै उनी लगातार पाँच संस्करणमा गोल गर्ने खेलाडी समेत बनेका छन् । रोनाल्डोले डेब्यु संस्करणमा २ गोल गरेका थिए । त्यसपछिको तीन संस्करणमा क्रमश १,३ र ३ गोल गरेका छन् । 
यस जितसँगै समूह ’एफ’ मा रहेको पोर्चुगलले महत्वपूर्ण ३ अंक जोडेको छ । पोर्चुगल समूहको शीर्ष स्थानमा रहेको छ । हारबाट प्रतियोगिताको सुरुवात गरेको हंगेरी पुछारमा रहेको छ ।