युरोकप: फ्रान्स समूह विजेता, पोर्चुगल पनि नकआउट चरणमा

१० असार, हेटौंडा । फ्रान्स समूह विजेता बन्दै १६ औं संस्करणको युरोकप फुटबलको नकआउट चरणमा प्रवेश गरेको छ ।
हंगेरीको बुडापेस्टमा बुधबार राति भएको समूह चरणको अन्तिम खेलमा पोर्चुगलसँग २-२ गोलको बराबरी खेल्दै फ्रान्स समूह विजेता बनेको हो ।
हंगेरीको पुस्कास एरिनामा फ्रान्सका लागि करिम बेन्जिमाले दुई गोल गरे भने पोर्चुगलका लागि क्रिस्टियानो रोनाल्डोले दुई गोल गरे ।
रोनाल्डोले पोर्चुगलका लागि दुबै गोल पेनाल्टीमा गरेका हुन् । उनले खेलको ३१ र ६० औं मिनेटमा पाएको पेनाल्टीको सदुपयोग गरेका थिए ।
यस्तै करिम बेन्जिमाले पहिलो गोल पहिलो हाफको इन्जुरी समयमा पेनाल्टीमा गरेका थिए भने पाउल पोग्बाको पासमा बेन्जिमाले ४८ औं मिनेटमा व्यक्तिगत दोस्रो गोल गरेका थिए ।
यस बराबरीसँगै समूह 'एफ' मा रहेको फ्रान्सले ३ खेलमा ५ अंक जोडेर शीर्ष स्थानमा रहदै अन्तिम १६ मा स्थान पक्का गरेको छ। अब फ्रान्सले अन्तिम १६ मा स्विट्जरल्यान्डसँग खेल्नेछ ।
फ्रान्ससँगको बराबरीसँगै पोर्चुगलले ३ खेलमा ४ अंक जोड्यो । पोर्चुगलपनी समूहको उत्कृष्ट तेस्रो टिम बन्दै नकआउट चरणमा प्रबेश गर्‍को छ । अब पोर्चुगलले अन्तिम १६ मा बेल्जियमको सामना गर्ने छ ।