कामदारलाई अब न्यूनतम पारिश्रमिक १५ हजार दिनुपर्ने

२ असार, काठमाडौं । साउन १ गतेदेखि लागू हुने गरी न्यूनतम तलब र महँगी भत्तासमेत गरी न्यूनतम पारिश्रमिक १५ हजार निर्धारण भएको छ । सरकारले जारी गरेको न्यूनतम पारिश्रमिक नै लागू गर्ने सहमति भएको हो । 
श्रमिकको न्यूनतम पारिश्रमिक सम्बन्धमा चिया बगानका मजदुरबाहेक उद्योग प्रतिष्ठानमा काम गर्ने श्रमिकका लागि साउन १ गतेदेखि लागू हुने गरी न्यूनतम तलब र महँगी भत्तासमेत गरी न्यूनतम पारिश्रमिक १५ हजार निर्धारण गरी सरकारले राजपत्रमा सूचनासमेत प्रकाशन गरिसकेको छ ।
न्यूनतम पारिश्रमिक सम्बन्धमा मजदुरका छाता संगठन ट्रेड युनियन, निजी क्षेत्रका छाता संस्था, रोजगारदाता र सरकार समेतको त्रिपक्षीय सहमतिमा न्यूनतम पारिश्रमिक निर्धारण गरी लागू गर्ने परम्परा रहेकामा सरकारले एकलौटी ढंगले न्यूनतम पारिश्रमिक निर्धारण गर्ने प्रक्रियाप्रति सरोकारवालाहरुले असहमति जनाउँदै आएका थिए । 
संयुक्त ट्रेड युनियन समन्वय समिति, प्रमुख ट्रेड युनियनका प्रतिनिधि र नेपाल घरेलु तथा साना उद्योग महासंघ, राष्ट्रिय उद्योग व्यापार महासंघ, साना तथा मझौला व्यवसाय महासंघ समेतको उपस्थिति र सहमतिमा श्रमिक र रोजगारदाता दुवै पक्षबीच संयुक्त छलफल गरी न्यूनतम पारिश्रमिकबारे सहमतिमा पुगेको नेपाल घरेलु तथा साना उद्योग महासंघले जनाएको छ ।