प्रमुख महतले भने–‘२५ मिटरबारे निर्णय गर्ने अधिकार छैन’

File Photo

१७ भदौं, हेटौँडा । हेटौँडा उपमहानगरपालिकाका प्रमुख हरिबहादुर महतले २५ मिटर सडक विस्तारबारे निर्णय गर्ने अघिकार आफुसंग नरहेको बताएका छन् । 
मकवानपुर फर्निचर तथा फर्निसिङ व्यवसायी संघको १२ औं बार्षिक साधारणसभा एवं जिल्ला अधिवेशनमा बोल्दै नगर प्रमुख महतले उपनगरपालिकालाई २५ मिटर सडक विस्तारबारे निर्णय गर्ने अधिकार नरहेको बताए । उनले राष्ट्रिय राजमार्गबारे निर्णय गर्ने अधिकार उपमहानगरपालिकासंग नभएको भन्दै मानव वस्तिको बीचबाट राजमार्ग जान नसक्नेमा भने आफु सहमत रहेको बताए । उनले सडक विस्तार गर्नुपर्छ भन्नेहरुको संख्या ठूलो रहेको भन्दै विस्तार नगर्दा आफुलाई विकास विरोधीको आरोप लागिरहेको बताए । 
निर्णय गर्ने अधिकार आफुसंग भई दिएको भए आफुले बेलैमा ठोस निर्णय गरिदिईसक्ने उनको भनाई थियो । उपमहानगरले वाईपासलाई प्राथमिकतामा राखेको समेत उनले जानकारी दिए । उनले हेटौँडा नगर क्षेत्रभित्र सडक मिचेर बनेको घर टहरा भत्काउने दावि गरेका छन् । यसका लागि नगरबासीको समेत साथ आवश्यक रहेको बताए ।
कार्यक्रममा मकवानपुर उद्योग बाणिज्य संघका अध्यक्ष राजकुमार न्यौपानेले २५ मिटर विस्तारका कारण धेरै घरधनी र व्यवसायीले दुःख पाएको भन्दै यसको निक्र्यौलका लागि नगर प्रमुख महतको ध्यानाकर्षण गराएका थिए । 
संघका अध्यक्ष शम्भु ढकालको अध्यक्षतमा भएको कार्यक्रममा मकवानपुर उद्योग बाणिज्य संघका महासचिव महेन्द्र राउत, कार्यसमिति सदस्य अनिल अग्रवाल, फर्निचर तथा फर्निसिङ व्यवसायी महासंघका केन्द्रीय सचिव गोकुल श्रेष्ठ, संघका पूर्व जिल्ला अध्यक्ष यम सिल्वाल लगायतले मन्तव्य व्यक्त गरेका थिए । अधिवेशनले गोकुल श्रेष्ठको अध्यक्षतामा नयाँ कार्यसमिति चयन गरेको छ ।