१० हिमाली जिल्लाका नागरिकलाई खोप लगाइँदै 

google

४ असोज, हेटौंडा । आजबाट १० हिमाली जिल्लाका १८ वर्षभन्दा माथिका नागरिकलाई कोरोना विरुद्धको भेरोसेल खोप लगाइदैछ । 
स्वास्थ्य तथा जनसंख्या मन्त्रालयकाअनुसार ताप्लेजुङ, संखुवासभा, सोलुखुम्बु, रसुवा, जुम्ला, मुगु, हुम्ला, डोल्पा, बाजुरा र दार्चुलामा १८ वर्षमाथिका नागरिकलाई भेरोसेल खोप लगाउन लागिएको हो । 
काभ्रे र चितवनमा ३५ वर्ष माथिका खोप लगाउन बाँकी सबै नागरिक र १८ वर्ष माथिका खोप लगाउन छुटेका विद्यार्थी, काठमाडौं, ललितपुर, भक्तपुर, मकवानपुर, रामेछाप, सर्लाही र अछाममा भने ४० वर्ष माथि र १८ वर्ष माथिका खोप लगाउन छुटेका विद्यार्थीलाई खोप लगाइनेछ । 
बाँकी ५८ जिल्लाहरुमा मनाङ, मुस्ताङ र रुकुमपूर्व बाहेकका ५५ जिल्लाका ४५ वर्ष माथिका खोप लगाउन बाँकी सबै नागरिक र १८ वर्ष माथिका खोप लगाउन छुटेका विद्यार्थीलाई खोप लगाउने स्वास्थ्य मन्त्रालयले जनाएको छ । 
यसअघि छुटेका अग्रपङ्क्तिमा खटिने, अत्यावश्यक सेवा, शिक्षक, पर्यटकीय क्षेत्र, होटल व्यवसायमा काम गर्ने व्यक्तिहरु समेतलाई खोप दिइनेछ । आजबाट असोज १४ गतेसम्म खोप लगाएकाहरुलाई कात्तिक ४ गतेदेखि१४ गतेभित्र दोस्रो मात्रा लगाइनेछ । 
खोप लगाउन जाँदा उमेर र पेशा खुल्ने परिचय पत्र अनिवार्य लिएर जान अनुरोध गरिएको छ ।